Lian Orluli, Ainaro 30,Novembru,2025— Governu subliña baliza entre Munisípiu Ainaro no Manufahi define klaru tuir mapa administrativu estadu no labele muda arbiru. Alerta ne’e fó sai tanba hetan presaun hosi Loro Babulu, ne’ebé husu atu Orana Mausiga no Mankati Leolima Hato-Udu tenke reafirma ba administrasaun Manufahi.
Antes ne’e, RTTL fó sai relatóriu ida kona-ba deklarasaun husi grupu Loro Babulu nian ne’ebé husu ba estadu atu reintegra Administrativu Orana Mausiga-Partesia, Postu Hato-Builiko, no Mankati-Leo Lima Postu Hato-udo ba Manufahi.
Maibé, tuir Diretór Jerál Diretúr Dezenvovimentu Governu Lokál, Ministeriu Administrasaun Esatal, Agosto Guterres, hatete pasu ida ne’e la fásil atu implementa tanba preokupa ho estabilidade komunitária no governasaun lokál.
“La’ós fásil ba Ainaro hodi fo fila fali Orana Mausiga ho Makanti Leo-lima Hato-Udu ba Manufahi. Povu hosi Postu rua ne’e agora hakarak moris hakmatek no foku ida ba dezenvolvimentu”, Diretur ne’e hatete iha enkontru ho responsável sira Manufahi nian no Prezidente Autoridade Munisipál Ainaro iha Salaun VIP Ainaro.
Entretantu, Prezidente Autoridade Munisípiu Ainaro, Manuela Georgina Bucar Corte-Real, subliña, governu Ainaro sei la foti desizaun bainhira laiha baze legál ne’ebé klaru.
“Fronteira sira estipula ona iha mapa nasional ofisial. Labele tenta fahe ka muda sira, tanba ida ne’e bele hamosu konflitu social, liga ho istória kultur’al rai rua ne’e maun alin “, PAM Ainaro subliña.
Iha sorin seluk,Aleixo de Jesus, Sekretariu Assuntu Sosiál Reprezenta PAM Manufahi, afirma katak la hatene ofisialmente kona-ba deklarasaun husi Loro Babulu, no Autoridade inosente ba deklarasaun hirak ne’e
“Ami seidauk simu informasaun ka koordenasaun ruma kona-ba deklarasaun husi Loro Babulu ne’ebé husu fila hikas Orana Mausiga no Mankati Leo-Lima Hato-Udu mai Manufahi,husi autordade munisípiu Maunufahi inosente ba deklarasaun ne’e”, tenik reprezentante PAM Manufahi, Sekretariu Assuntu Sosiál Aleixo de Jesus
Maski nune’e, Autoridade Loro Babulu mantein katak sira-nia pedidu ne’e bazeia ba ligasaun istórika no kulturál.
“Orana Mausiga no Mankati Leo-Lima Hato-Udu iha ligasaun kulturál ne’ebé maka’as ba Lisan Loro Babulu, tanba ne’e ami fiar katak nesesáriu atu suku Orana Mausiga no Huan Foho Ai-liku partensia Makati Leo-lima Postu Ahministrativu Hato-udo ne’e bele reintegra iha Manufahi,” dehan líder tradisionál Babulu ida via telefone.
Governu sentrál fó sai resposta ofisiál ba pedidu ne’e no husu ba parte hotu-hotu atu respeita provizaun fronteira administrativa no mantein paz entre komunidade sira iha área fronteira Ainaro-Manufahi.
Jornalista : Redasaun
