Lian Orluli, Domingu, 25 Janeiru 2026–Kamioneta karga naha ho produtu lokál ho naran REBER hetan asidente iha Domingu dadeer (25 Janeiru) maizumenus iha oras lorokraik 15:35 iha área Hatu-builico. Asidente ne’e akontese tanba kondisaun estrada ne’ebé aat.
Kamioneta REBER ne’e tuir informasaun tula modo ne’ebé destina husi postu Hato-Builiko ba Dili hodi fa’an. Maibé, bainhira hala’o hela viajen liu-hosi Hatu-builico, hetan asidente, karreta ne’e avaria tanba rai kuak, nune’e labele kontinua nia viajen.
Komunidade sira haktuir katak kondisaun estrada Hatu-builico kleur ona a’at no sai aat liután iha tempu udan. Akontesimentu ne’e aumenta tan lista naruk kona-ba difikuldade ne’ebé komunidade hasoru hodi transporta sira-nia produtu agríkola ba merkadu.
“Povu Hatu-builico triste tebes ho kondisaun estrada nian. Estrada ne’e hanesan ami nia asesu prinsipál ba transporte produtu agríkola sira ba merkado,” dehan komunidade ida ba jornalista Lian Orluli iha fatin akontesementu
Komunidade esperana governu sei foti asaun lalais hodi hadia estrada Hatu-builico. Hadi’a infraestrutura konsidera hanesan krusiál atu fasilita atividade ekonómika, partikularmente iha transporte produtu agríkola sira ba merkadu boot sira hanesan Dili.
To’o hakerek ida-ne’e, seidauk iha relatóriu sira kona-ba vítima sira iha insidente ne’e, maibé lakon materiál sira no produtu sira.
Jornalista: Sandra/Cristina
Editor : Clementina Fatima
