Lian Orluli , 26 Juñu– Komunidade Ainaro hala’o misa requiem no prosisaun onra ba saudozu Francisco Guterres, eis Prezitente da Repúblika nu’udar espresaun agradesimentu no apresiasaun ba ninia servisu hodi harii nasaun demokrátiku ba povu Timor-Leste. Eventu solene ne’e hahú ho misa requiem iha igreja Paroquia Ainaro, ne’ebé partisipa husi membru Veteranu, komunidade, Lideransa Komunitariu, lider igreja, no komunidade sira. Tuir misa, no prosisaun kontinua ho viajen husi igreja ba ossuáriu, lori ai-fuan nu’udar símbolu respeitu, domin, no agradesimentu kle’an ba matebian.
Iha atmosfera ne’ebé emosionalnte, komunidade Ainaro hanoin hikas dedikasaun no devosaun Francisco Guterres “Lú-Olo,” ne’ebé durante nia moris fó kontribuisaun ba luta independénsia no dezenvolvimentu demokrasia iha Timor-Leste.
Sira konsidera matebian nu’udar líder ida ne’ebé simples, sempre tau uluk interese povu nian no luta ba unidade nasionál.
Reprezentante komunidade sefe suku Mau-ulo afirma katak prosisaun ne’e la’ós de’it hanesan rituál relijiozu no kulturál, maibé mós hanesan omenajen ikus ba figura ida ne’ebé dedika nia moris ba nasaun no povu Timor-Leste.
“Liu husi misa requiem no prosisaun ida-ne’e, ami hakarak hato’o ami nia agradesimentu sinseru ba matebian nia sakrifísiu no dedikasaun hodi harii nasaun demokrátiku ida. Karik nia bele deskansa ho dame, no nia servisu sira sei lembra nafatin hosi jerasaun sira iha futuru”, hatete hosi Lideransa Komunitariu suku Mau-ulo,Luis Culaco ne’ebé marka prezensa iha eventu nu’udar mós membru Partidu FRETILIN, kordenador suku nian.
Prosesaun iha Ainaro nu’udar evidénsia ida katak povu Timor-Leste kontinua hanoin no apresia servisu sira husi líder sira ne’ebé fó ona kontribuisaun signifikativu ba nasaun iha prosesu konstrusaun nia lala’ok ba demokrasia no independénsia ne’ebé goza ohin loron.
Atividade ne’e realiza, Kontrubuisaun makas husi Jerasaun Patriota, Kopera ho konseilo Veterano, no Autoridade Munisipiu Ainaro.Hetan seguransa masimu husi PNTL no F-FDTL
Jornalista: Lucya/Fanesia
Editor : Clementina Fatima
