Lian Orluli 26 Juñu 2026 – Povu Ainaro, hala’o Misa Requiem iha Parókia Ainaro hodi fó omenajen finál ba Saudozu Eis Prezidente Repúblika Demokrátika Timor-Leste, Sr. Francisco Guterres “Lú-Olo”.
Missa ne’e lidera husi Padre Pároku Ainaro, Padre Alberty Franco Morato. Iha nia omilia, Padre Alberty subliña katak mate nu’udar serteza ida ne’ebé ema hotu-hotu sei sente no husu ba komunidade tomak atu fó onra nafatin ba nasaun nia fundadór sira.
“Saudozu fó kontribuisaun ne’ebé signifikativu. Ita-nia prezensa iha misa ne’e hanesan omenajen ikus ida ba Sr. Francisco Guterres ‘Lú-Olo’. Mate ne’e sertenza no ema hotu nian” dehan Padre Alberty.
Nia mós sita mensajen hosi Livru Salmo sira: “Ha’u la’o to’o rohan ho buat ne’ebé ha’u iha; ha’u fó buat hotu iha moris ne’e.” Padre Alberty konvida kongregasaun atu reza ba saudozu, ne’ebé fó kontribuisaun signifikativu ba nasaun atu nune’e povu Timor-Leste bele hamriik nu’udar nasaun independente.
“Nia hanesan líder di’ak ida no aman ida ne’ebé hatudu ezemplu ba nia oan sira liu hosi edukasaun di’ak no prepara jerasaun tuirmai ba futuru ida di’ak “, nia hatete.
Liután, Padre Alberty subliña katak respeitu ba ita-nia aman sira ne’ebé kontribui harii Nasaun ida ne’e.
“Ita nia respeitu ba aman sira ne’ebé harii kontribui ba estadu ida ne’e, sukat ita nia nia ibun no liafuan, la bele hasai liafuan ne’ebé la merese ba sira”
Nune’e mós Reprezentante Autoridade Munisípiu Ainaro sekretáriu Administrasaun Finansas. Albertino de Araújo hato’o sentimentu profundu ba saudozu.
“Hakarak hato’o agradese ba aman Fundadór Saudozu Francisco Guterres ‘Lú-Olo’, sentidu no kondulensia profunda ne’ebé klean no oneigado ba ita nia kontribusaun harii ona nasaun ida ne’e, ba ami agradese ba Konseillo Veteranu no Jerasaun Patriota,bele realiza ona misa ne’e ba saudozu” dehan Reprezenta Autoridade Munisípiu Ainaro.
Missa Requiem ne’e hala’o ho solene no hetan partisipasaun husi sarani Katólika, Autoridade Munisípiu Ainaro, Autoridade Seguransa PNTL, lideransa komunitária, no Ainaro oan sira inklui ho estudante sira, fó sira nia omenajen finál no fó sira nia respeitu ba saudozu Francisco Guterres “Lú-Olo”.
Joenalista: Carla/Noy/Elfiana
Editor : Clementina Fatima
