Lian Orluli— Udan Boot iha loron Sábadu fin de semana ne’e to’o ohin loron rezulta rai halai no halo estrada diresaun suku Soro liga ba suku Suro–Craik, postu administrativu Ainaro, munisípiu Ainaro kotu total hodi difikulta movimentu transporte públiku no komunidade.
“Udan boot durante semana ne’e halo rai halai no rezulta mós estrada kotu. Ami preokupadu tebes ho kondisaun estrada ne’ebé kotu iha area suku Soro, tanba liga ho tempu eleisaun besik ona, tan ne’e difikulta tebes atividade lubuk ida mak labele halo liu-liu mai ami suku Suro-Craik, tanba estrada ne’e dala públiku mai ami,” Xefe suku Suro-Craik, Ronaldo Soares, hatete ba jornalista Orluli iha Ainaro, Tersa (09/05).
Tanba ne’e, xefe suku ne’e husu ba Ministériu Obras Públika (MOP) atu bele rezolve lalais kestaun ne’e, tanba difikulta mós distribuisaun materiál konstrusaun Uma Naroma ba Povu, ne’ebé daudaun ne’e kontinua prosesu konstrusaun iha suku Suro-Craik.
“Dalan alterbativu iha, maibé ita tenke liuhusi Bolbeta nian, ne’e besik liu no di’ak tebes, tan ne’e ami nu’udar autoridade lokál sei esforsu buka dalan hodi rezolve dalan ne’ebé kotu, atu nune’e labele difikulta komunidade sira halo movimentu ba mai, hodi bele fa’an sira nia produtu no mós liga ho eleisaun besik daudaun ona,” nia hateten.
Entretantu, xefe suku Soro, Miguel Pereira de Araújo, hatete, akontesimentu ne’e iha Sesta kalan foin lalais udan boot, no rai halai monu ba mota naruk kuaze metru 15 no nia luan metru 6, ne’e husi akontesimentu primeiru maibé ohin loron aumenta tan.
Tanba ne’e, nia rekomenda ba Governu atu bele atende ho emerjénsia no lais nune’e labele fó impaktu ba komunidade ne’ebé hela besik iha area refere.
Hatán ba kestaun ne’e, Diretór Servisu Obras Públika munisípiu Ainaro, João Henrique de Araújo, hatete nia parte tenta ona ho kompañia balun nune’e iha tempu badak bele rezolve ona estrada ne’e.
“Relasiona ho situasaun udan monu rai halo rai hai no rezulta estrada barak mak kotu no halo ameasa hela atu kotu, tanba ne’e husi ekipa tékniku sei ba observa. Maibé husi parte ita nian tenta ona ho kompañia balun hodi atende emerjénsia lai nune’e bele uza iha tempu eleisaun ne’e,” nia haktuir.
Nia afirma liután katak, orsamentu hodi ba atende emerjénsia tinan ne’e iha munisípiu Ainaro ladún iha koñesimentu, entaun proposta bele ba direta iha MOP mak bele responde.
Enkuantu, tuir observasaun Lian Orluli iha terenu nota katak, estrada liga ba Suku Suro-Craik kotu kuaze metru 60, no bainhira laiha atendimentu emerjénsia entaun bele fó impaktu mós ba komunidade nia uma ne’ebé hela besik iha area refere.
Editor : Lian Orluli
