Lian Orluli — Inan faluk Ana de Araújo ho idade 35 ko’alia ho lian maka’as ba lider polítiku sira hapara ona lia bosok iha palku polítiku iha tempu kampaña, tanba povu beik ona labele uza hanesan instrumentu ida hodi atinji sira nia objetivu, bainhira hetan tiha votus no servisu di’ak haluha hotu.
“Tempu kampaña hanesan ne’e, lideransa polítiku sira mai hakilar maka’as los no aprezenta programa sira dehan atu hadi’a povu nia moris, to’o vota sira hetan tiha votus ba tuur iha AC malirin haluha hotu promesa sira ne’e, tanba ne’e labele uza povu beik ne’e hanesan instrumentu ida hodi atinji objetivu polítiku,” negosiante inan faluk Ana de Araujo, hateten ba lian Orluli iha fatin halo negósiu nian Ainaro, Segunda (15/05).
Ana de Araújo orijen husi Suku Manutaci, Postu Administrativu Ainaro, Munisípiu Ainaro, loron-loron fa’an kioske ki’ik ida hanesan Supermie, Pop mie, bee Aqua, kafé no mós dosi sona, atu bele hetan osan hodi sustenta ba ninia moris.
“Ha’u nia moris loron-loron fa’an sasán hanesan ne’e, husi buat sira ne’e maka ajuda ha’u hetan netik osan rahun balun hodi sosa netik hahán hodi bele sustenta ha’u nia oan sira han no balu selu ona sira ba eskola,” nia hateten.
“Ha’u nia oan na’in-5, mane 4 no feto 1, enkuantu mane boot na’in-rua ne’e foin iha Sekundária no feto ne’e iha sekundária, na’in-rua sei ki’ik, tanba ha’u nia la’en ho ha’u divórsiu ona ha’u mak tenke esforsu hodi sustenta sira,” nia hatutan.
Nu’udár inan faluk ida tenke esforsu hodi buka osan, maski moris ho negósiu ki’ik maibé natoon atu bele ona atu ne’e bele responde nesesidade uma laran no mós ba oan nia eskola, maski moris iha sidade difisil atu hetan osan, hakarak ka lakohi tenke buka negósiu ki’ik ne’ebé maka iha atu nune’e bele hakmaan-an família uma laran no oan sira nia eskola.
“Sasán sira ne’e ha’u fa’an haknauk de’it sosa iha loja mai fa’an rahun fali, maibé agradese ita bele hetan hodi tulun ita nia han hemu, no bele responde oan sira nia eskola,” nia hakotu.
Editór : Lian Orluli
