Lian Orluli — Autoridade Protesaun Civìl munisipiu Ainaro (APC) rejista uma afetadu dejastre naturais 60 no uma Naroman ba povu(UNP) ida rahun, durante udan loron 4, iha tempu bailoron.
“Udan bo’ot ne’ebe maka akontese hahu husi dia 3-4-5 fulan Jullu tinan ne’e iha Ainaro, Autoridade Protesaun Civíl hamutuk ho CVTL , rekolha ona dadus uma afetadu hamutuk ne’en nulu (60) no husi uma ka’in 60 ne’e Autoridade Protesaun Civíl, CVTL no mos Autoridade Munisipal apoiu ona sasan emerjènsia ba familia vìtima uma ka’in hamutuk 34, ba uma ka’in rua-nulu resin ha’at(24) hein destribui ikus, tanba dadaun ne’e estok iha armajen sei menus”. Hateten Comandante APC Munisipiu Ainaro, Inspetor Afonso da Silva, Iha nia knar fatin.
Autoridade Protesaun Civíl Inspetur Afonsu hatutan tan alende desastre naturais no hamosu erusaun, inundasaun, akontese mos Sidadaun ida mate tanba rejulta husi mota lori.
“ Durante iha tempu uda iha mos insidenti ida, sidadaun ida be’e lori husi mota be’e luli nian, komunidade sira hetan fali iha mota Cassa, no sidadaun ne’e husi suku Suru-craic, tuir kronolojia katak vìtima sai husi uma ba to’os kuaze loron tolu ona la fila ba uma, husi informasaun ne’e ekipa Bomberus ho DNSPP tun kedas ba terenu ho suporta masimu husi komunidade suku Suru-craic inklui mos suku Cassa hodi buka tuir iha to’o ikus mai laos lakon maibe tamba matebian atravesa moota ho velosidade makas tamba ne’e mak mota lori, husi distansia ne’ebe do’ok tebes, no ekipa konsege hetan evakua kedas mate isin hodi entrega ba familia vìtima”. Nia hatutan
Ho situsaun desastre naturais ne’ebé maka akontese iha Munisipio Ainaro, rejulta mos sidadun ida mate, tanba ne’e Comandante APC munisipiu Ainaro husu ba komunidade sira ne’ebé maka hela iha fatin risku, atu muda ba fatin seluk ne’ebé maka seguru, nomos tenki matan moris no neon nain
Jornalista : Norvia
Editor : Lian Orluli
