Lian Orluli— Sekretario Estadu Cooperativa,SECOOP parseria ho ONG PLAN fasilita formasaun kooperativa báziku ba membru Grupo VSLA/ Rai Empresta Osan hamutuk na’in 22 mai husi Postu Hatobuilico no Ainaro durante loron lima
Ba Lian Orluli, Chefe Departamentu Edukasaun Formasaun no Informasaun SECOOP,Juvelino Gomes Bianco de Araùjo iha intervista hateten, objetivu formasaun atu partilha informasaun baziku kooperativa nian atu hakle’an membru grupu sira nia konesementu ba prosesu hari’i kooperativa iha Ainaro Villa
“Objetivu formasaun durante loron lima ne’e atu partilha formasaun baziku kooperativa nian sai hanesan matadalan hodi hakle’an membru grupu sira hotu nia konesementu hodi komprende diak prosesu prosedura sira oinsa maka sira bele hari’i kooperativa tuir komitmentu ne’ebe sira iha,nune’e bele dezenvolve no hadi’ak sira nia jestaun ekonomia familia uma laran no mos sira komunidade rasik liu husi benefisiu ne’ebe mak sira sei hetan husi kooperativa bainhira investe ona osan hamutuk tamba ne’e ohin loron ikus ba formasaun loron lima nian ita apresia tamba membru grupo sira bele entende ho di’ak hodi koopera hotu hodi hari’i kooperativa kreditu foun iha Ainaro-Villa ho naran kooperativa Creditu Uniaun-Ainaro Investe ba Futuro,CU-AIF no ohin sira hahu kedan ho atividade hanaran transaksaun ka rai osan ba dahuluk kooperativa nian, nune’e SECOOP nafatin koopera ,espera ba oin sira bele hetan tan legalidade husi Ministèriu Justisa atu sira bele hala’o mos atividades multisectoral sira ne’ebe maka sira planeia hela ona iha kooperativa bele la’o ho diak iha Ainaro”, (20/10/2023) Chefe Juvelino hateten
Chefe Departamentu ne’e mos hatutan tan SECOOP prontu koopera liu husi informasaun no formasaun ba membru kooperativa no grupu sira ne’ebe presiza apoiu
“Antes ne’e SECOOP fasilita ona formasaun hanesan ba komunidade husi grupo lubuk ida iha munisipio 12 ne’e kooperativa hamutuk atus-rua resin ona maka ita estabelese inklui munisipio Ainaro rasik no sei kontinua koopera atu bele partilha nafatin informasaun no formasaun kooperativa nian ba ho komunidade grupo sira hotu iha Timor laran tomak ne’ebe presiza SECOOP nia apoiu hanesan agora iha Munisipiu Ainaro nian temi jeralmente husi Postu Hatu-builiko,Maubisse no Ainaro, kooperativa hamutuk sanulu-resin tolu la inklui kooperativa sira ne’ebe maka atividade paradu, kooperativa ne’ebe estabelese ona iha Ainaro halai liu ba iha Produsaun Agrikultura no Kreditu,hanesan ita hotu hatene ida maka, kooperativa Produsaun Agrikultura ka Loja do Povu Ainaro, CU-RADIFU,CU-MHF iha postu Maubisse,CU-LAHO ,CU-AIF ne’ebe foin hari’i ohin inklui sira ne’ebe estabelese ona ho fatores hanesan iha Munisipio Ainaro”. Nia hakotu
Alemde ne’e Partisipante Almerindu Magno da Cruz hanesan Prezidente kooperativa CU-AIF Agradese no rekomenda SECOOP atu koopera hodi apoiu liu husi formasaun
“Agradese ba SECOOP no ONG PLAN ne’ebe hamutuk hodi fasilita ona formasaun lubuk ida mai ami durante ne’e,materia interesadu lubuk ida nebè haforsa ona ami nia komitmentu hodi bele hari’i ona kooperativa CU-AIF iha Ainaro Villa, rekomenda ba SEECOOP atu apoiu nafatin ami liu husi informasaun no formasaun baziku sira liuliu konaba kooperativa ninian atu ami nafatin iha konesementu nebè di’ak hodi hadi’ak liu tan jestaun ekonomia iha familia uma laran no ba mos komunidade seluk “. Almerindu hakotu
Entertantu tuir observasaun Orluli nota katak atividade realiza iha salaun Albertina Kami-laran husi formador na’in 2 ba partisipante hamutuk na’in 22 ne’ebe maka sai ona membru ba kooperativa foun CU-AIF nian .
Esj: Nina/Marcia/Norvia
Editor: Lian Orluli
