Lian Orluli— Agrikultór Foho-Ai-lico, Postu Administrativu Hato-udo, Munisípiu Ainaro, preokupa ho Batar besik ektare 17, ne’ebé ataka hosi peste, iha aldeia Bobe mate hotu, tanba udan laiha.
Francelina Vicente nu’udar agrikultór, sente triste tebes haree batar sira hetan estragus husi peste, tanba ne’e husu ba governu atu apoia ai-moruk hodi hamate peste ne’e.
“Ministériu Agrikultura Munisípiu Ainaro atu hanoin netik ami, lori ai-moruk hodi hamate ular no fini foun balun mai, tanba ami-nia ai-haan sira hetan estragus hotu,” dehan To’os-na’in Francelina ba Lian Orluli, Sábadu (3/2/24).
Rezidente Alberto da Costa hatutan, iha tempu bailoron naruk, komunidade husi parte kosta súl Bobe nia batar iha to’os mate hotu tanba udan-been laiha.
“Triste loos haree ba ha’u-nia produtu sira-ne’e maran hotu hanesan ne’e, tanba durante ne’e ami moris husi ai-haan sira-ne’ebé ami kuda rasik iha to’os laran,” Albertino preokupa.
Nia nafatin rekomenda ba governu tau matan ba komuniade aldeia Bobe nian atu bele responde netik ai-han ruma hodi sustenta sira-nia moris.
Xefe suku Foho Ai-lico informa, komunidade iha suku Foho-Ai-lico tinan ne’e hasoru problema maka ai-haan, tanba bailoro naruk, maske iha fulan-dezembru tempu udan maibé lato’o ba iha area Bobe parte kosta súl.
Maske nune’e komunidade sira konsege kuda duni batar iha fulan-janeiru ne’e konsege moris maibé mate hotu tanba udan been lato’o iha área Bobe kosta súl nian.
“Iha suku Foho-Ai-lico maioria mesak komunidade agrikultór hotu, komunidade sira husi parte foho nian maka hetan estragus husi peste ne’e, maibé husi parte tasi nian iha aladei tolu; Fatumeta, Betsiku, no Wekatar kuaze mate hotu tanba udan laiha,” Xefe Suku, Foho Ai-liko Filomeno da Costa hateten.
Xefe suku ne’e rekomenda Diretór servisu Munisipál Agrikultura, Peska no Floresta, atu lalais rezolva peste ne’ebé maka oras ne’e estagus hotu komunidade sira-nia batar.
Nune’e mós bele apoia ai-haan urjénsia ba komunidade Bobe parte kosta súl nian tanba fini batar nia hotu ona.
Relasiona ho preokupasaun ne’e, Diretór Servisu Munisipál APPF, Aguida Judit Mendonça, iha ona dadus husi estensionista sira rekolla to’os besik ektare 17 maka hetan estragus husi peste.
“Estensionista sira iha terrenu hola ona dadus ba komunidade agrikutór sira-ne’ebé halo to’os iha área tetuk postu Hato-Udo hamutuk uma-kain 21 nia to’os besik ektare 17 maka hetan estragus husi peste, tanba ne’e ami sei haree hamutuk ho parte relevante sira hodi responde ai-haan ba sira, maibé ekipa sei tún direita ba terrenu hodi haree problema neebé maka komunidade sira hasoru,” Diretór Agrikultura Munisipál Ainaro ne’e promete.
Enkuantu populasaun totál suku foho Ai-lico 6.266, aldeia Bobe parte Kosta Súl 502.
Kuntribuisaun: Acasio
Editór :Lian Orluli
