Biografia no Historia Badak Husi Saudozu Fernando Xavier “Mauforu”
Saudozu Fernando Xavier, Mauforu, moris iha Aldeia Lugatu, Sucu Ainaro. iha loron 15, fulan Agosto tinan 1947 husi uma lisan Sosmali, oan husi Aman Armindo Pinto no Inan Arminda Amaral, matebian.Saudozu Fernando Xavier “Mauforu” iha maun alin nain neèn, feto tolu, mane tolu, mak hanesan Lourenso da Costa (mate), Alipio, Ermelinda Almeida, Adriana (mate), Daumeta (mate) no Saudozu Fernando Xavier.
Iha tinan 1963, Saudozu Fernando Xavier “Mauforu” hahu tama escola primaria iha Posto Hatobuilico Ainaro no remata kuarta klase iha Maubisse kontinua iha liceu to VI Klase.
Iha tinan 1970 Saudozu hetan rekrutamentu ba tropa Portuges obrigatoriu durante tinan tolu no remata iha Junho 1973. Iha Outubru tinan 1973 Saudozu hetan nomeasaun hanesan, Professor do postu escolar, servisu edukasaun iha Beco, Zumalai hafoin hetan formasaun intensivu iha Eskola Liseu Dili.
Iha tinan 1975, Saudozu hahu involve iha forsa Falintil hodi halo funu kontra Golpe iha Dili. Iha loron rua fulan outubru 1975 Saudozu forma Familia no simu sakramentu matrimoniu iha Igreja Becora Dili husi Reverendu padre Agostinho. Saudozu kaben ho Carlota Olinda Araujo Xavier, hafoin simu tiha sakramentu matrimoniu Saudozu lori nia kaben Carlota mai hela iha Ainaro. Hodi hari uma kain neè Saudozu ho nia kaben hetan oan nain 13 kompostu husi Mane 7 no feto 6, mane ida mate. hela deit nain 12 mak hanesan Meirinha Xavier, Mariano Xavier, Joeder Xavier, Pulqueria Xavier, Edegar Xavier, Ersia Xavier, Dulce Xavier, Carlito Xavier, Madalena Xavier, Crizogno Xavier, Glyseria Xavier, Ivanta Xavier “Matebian”, Natalicio Xavier “Aico”.
Hafoin lori tiha nia kaben mai Ainaro, Saudozu fila fali ba Dili hodi partisipa iha serimonia proklamasaun independensia 28 novembru Iha tinan 1975 iha Dili. Hafoin partisipa iha loron proklamasaun independensia Saudozu fila kedas mai Ainaro hodi hamutuk ho familia. Bainhira militar Indonesia domina ona Timor Leste, inklui Ainaro, saudozu ho forsa Falintil sira seluk hahu konsolida forsa sira hamutuk ho komandante Venancio Feraz, komandante Jose Xavier, Januario Xavier, “Lecas” no sira seluk. Iha tinan 1976 iha baze de apoiu, saudozu ho komandante sira ne’e hahu forma kampanhia da luta libertasaun iha Mamlau iha komitee regional Fretilin ne’ebe lidera husi Saudozu Martinho Araujo Xavier no Saudozu Asistente Bernardino Xavier. Hafoin forma tiha komandu Mamlau Saudozu sira hahu harii fali komandu Kompanhia Lugatu ho komandante Jeral Venancio Feraz no Adjuntu Komandante Jose Xavier. Iha Kompanhia Lugatu saudozu assume kargu hanesan komandante kompanhia, saudozu hetan nomeasaun direta husi Saudozu Comisario Politiku Cesar Maulaca. Durante tinan tolu (1976-1978) saudozu lidera kompanhia Lugatu hodi halo funu hasoru inimigu sira iha Ainaro. Durante tinan tolu ezistensia kompanhia Lugatu iha tentativa asaltu oi-oin ba kompanhia Lugatu, maibe saudozu ho nia forsa falintil sira konsege konvense. Ikus liu iha tinan 1978 inimigu konsege vense/hadau Kompanhia Lugatu ho harahun baze de apoiu. Hafoin baze de apoiu rahun saudozu hetan orden husi komandu hodi halo evakuasaun ba populasaun sira hamutuk ho forsa Falintil lubuk ida hodi akompanha populasaun sira husi Lugatu ba to’o Atsabe, husi Atsabe fila fali mai Uskai no ikus hetan fali orientasaun hodi evakua populasaun ba area leste, Manufahi. Saudozu akompanha ho forsa hamutuk 65 kompleto ho arma. Bainhira to’o iha Alas-Fatuberlihu, saudozu ho nia forsa sira hetan dezarmamentu husi Komite Central Fretilin iha Alas tanba diverzensia Politika. Hafoin dezarma tiha, Sira Nia Armas Hanesan Pistola Ida Ho kilat 65 saudozu akompanha nafatin populasaun sira hodi evakua fali mai area Sul Betano no ikus mai saudozu ho populasaun atus ida liu, hetan kapturasaun husi tropa Indonesia iha area Betano, Manufahi. Iha inisiu tinan 1979 depois saudozu ho populasun sira muda transfere fali mai iha Postu Hato-Udo, nune’e bele besik ba familia sira iha Ainaro. Iha postu Hato-Udo saudozu hetan detensaun no presegisaun maka’as husi tropa Indonesia iha koramil Hatu-udo.wajib Lapor Ba military Indonesia durante hela iha Hato-udo .
Iha tinan 1981 saudozu reverendu padre Deometrio Barros halo karta ba Camat Mateus hodi husu saudozu Mauforu atu mai Ainaro. Nune’e Camat Mateus rasik ba koalia tentara sira hodi halo Guia de marsa ba saudozu ho familia hodi muda mai hela iha Ainaro. Iha tempu ne’eba liu husi apoiu husi Reverendu Padre Deometrio, saudozu hetan servisu iha Kartoriu Igreja Ainaro nian ho salariu lima ribu rupiah karik agora lima pulu sen fulan ida, ho salariu ida ne’e saudozu bele sustenta nia moris. Maske iha tempu difisil nia laran maibe saudozu kontinua halo servisu rede klandestina hodi halo ligasaun nafatin ho forsa Falintil sira iha ailaran.
Iha tinan 1983 saudozu Mauforu hetan tan kapturasaun husi tropa sira hodi ba detein iha Kodim Ainaro durante semana rua hamutuk ho populasaun barak, saudozu hetan torturasaun ida maka’as tebes husi forsa Indonesia sira, saudozu mos hetan tentativa barak tebes atu oho, maibe tanba destinu maka seidauk to’o. kalan-kalan tropa sira sempre hasai populasaun barak lori ba fakar iha Builico, ne’ebe kunesidu ho Jakarta dua. Maibe Saudozu Konsege Livere husi detensaun durante semana rua no balu no fila hikas ba hamutuk ho familia maibe nafati halo wajib lapor diri durante tinan naruk nialaran.
Iha tinan 1983 -1998, saudozu hamutuk ho nia maluk resistensia sira hanesan CEJARIO Magno, Domingos Amaral ho Reverendu Padre Fransisco Bareto, Manuel Quintao, Adriano Magalhaes, Nazario Magno, Ancelmo Magno no sira seluk, organiza, rede klandestina iha Ainaro. Atividade klandestina ne’ebe saudozu ho nia maluk sira maka subar no proteze Komandante Mauhunu Bulerek Karatayano primeiru iha Padre paroquia Ainaro nia residensia, tanba deskonfia ona husi Militar sira maka saudozu ho nia maluk sira muda saudozu MAHUNU ba iha abrigu Tlugilu, iha momento neba ema nebe quidado no tein no fohan Saudozu maka Aquelina Ximenes no Odilia De Lima. tanba situasaun la seguru maka sira deside hodi muda fali komandante MAHUNU ba Manutaci no ikus Komandante MAHUNU hetan kapturasaun husi Militar Indonesia iha nia subar fatin Manutaci.
Iha prosesu sira ne’e Saudozu hanesan responsavel másimu iha area Lojistika, liu husi rede klandestina saudozu halo ligasaun direta ho Komandante Suadozu Nino konis Santa, hamutuk ho mestri Jeronimo Ex Deputado Fretilin Nebe (matebian), ona,Nelson (matebian), Avo Tailelo nebe Matebian ona. no joven sira hanesan Alexandrino Xavier, Zacarias de Araujo, Moises Barros, Flavio de Araujo, Lourenço Magno, Leoneto Amaral, Emilio Perreira, Filomeno Bianco no joven sira seluk hodi organiza apoiu Lojistika tantu husi kaixa klandestina sira iha DIli no Ainaro rasik hodi sustenta nafatin rezistensia forsa Falintil nian. Saudozu mos halo rede klandestina hodi fo protesaun ba abrigu Komandante em Chefi, Maun Bot Kay Rala Xanana Gusmao, iha abrigu Surukraik/Ainaro.
Alende ida ne’e, Iha 1989-Saudozu hamutuk ho Francisco da Costa Gonsalves-Aquileong, hodi harii Organizasaun Unidade Juventude Timor-Leste- UJTL, hodi halo servisu kontra inteligensia-SGI/Kopassus no halo agitasaun strategia militar Indonesia nia iha villa laran, liu husi jovens rsistensia nia iha Ainaro villa hanesan, sunu bandeira merah putih, halo terror, atividade ida ne’e saudozu halo hamutuk ho joven sira hanesan: Patroxino de Araujo, Cesario da Cunha no joven sira seluk hodi mobiliza no konvense populasaun sira hodi vota ukun rasik an liu husi referendu ka konsulta popular 1999. E Saudozu mos Fasilita Sertidaun barak ba joven sira hodi vota ba Ukun RasikAn
Iha 1990-1991, Saudozu hamutuk ho Sr. Aquileong hodi trasa dalan oinsa atu transporta Komandante em Chefi MBKXG husi Ainaro ba Dili.
Iha tinan 1999 saudozu hetan nomeasaun husi komandu da luta hodi assume kargu hanesan Sub-Regiaun Tatamailau, Ainaro to’o tinan 2003. Durante moris Saudozu dedika nia an tomak ba libertasaun independensia. Depois de 2003 Saudozo nafatin Kontribui Liu husi Komisaun Homenazem hodi hadia no trata dokumento ba Veterano Sira to Validasaun 2022.to remata.
Iha loron 19 fulan marsu 2023, tuku 03:00 madrugada saudozu husik hela mundu ne’e, husik hela tristeza boot ba familia ida ne’e, liu-liu ba feto faluk Carlota no oan 12 no beion sira hotu. no familia bot kolegas, amigos,Companhero, Camardas veteranos sira. E Saudozu Filha hikas Ba Aman Maromak nia kadunan Santo.Iha Renho Lalehan nian.
Uma lisan Sosmali lakon ona aihun boot ne’ebe sai mahon diak ba ema hotu.
Ida ne’e maka biografia badak husi Saudozu Fernando Xavier “ MAUFORU”
Adeus hau aman doben…Durante moris Saudoso sempre utiliza Lingua Nebe Hanesan Moto ba nia Mak Hanesan. “Eu Sou Aquele Que Sou” Hau Mak Hau.
Biografia ne’e prepara husi Familia Saudozu
