Lian Orluli – Ministru Interiór, Francisco da Costa Guterres, Ph.D, hamutuk ho Segundu Komandante Jeral PNTL, Komisariu Polisia Pedro Belo, Prezidente Komisaun Organizadora Promosaun Tranzitoriu, Paul Assis Belo no Diretur Diresaun Justisa no Disiplina Superintendente Xefi Polisia Justino Menezes, hala’o vizita serbisu ba Komandu PNTL Munisípiu Ainaro, hodi haree kondisaun ne’ebé membru sira enfrenta.
Iha vizita serbisu nee Ministru Interior hateten tinan ida ne’e sei hahu infraestrutura ba Komandu PNTL munisípiu Ainaro, mak hanesan Kuartel Komandu Munisípiu, Eskuadra PNTL Ainaro Vila no Eskuadra PNTL Hatubilico nomos sei rektua kadets 500 hodi kompleta rekursu
“Ita sei halo buat tolu, Primeiru maka promosaun hodi rezolve problema sira uluk ne’e, liu-liu kona ba estrutura. Segundu kona ba rekrutamentu PNTL, ita loke vaga 500, maibe 400 ba ajente sira no 100 ba ofisiais tanba barak maka tama ona iha idade reforma ne’e duni presiza polisia foun maibe programa no modalidade sira depois mak sei fó sai ba públiku. Terseiru mak prepara kondisaun infraestrutura baziku ba PNTL sira hodi halo serbisu ho diak liutan. Tinan ida ne’e nia laran ita hahu infraestrutura ba Komandu PNTL Munisípiu Ainaro, mak hanesan Kuartel Komandu Munisípiu, Eskuadra PNTL Ainaro Vila no Eskuadra PNTL Hatubilico. Kada postu sei iha kazerna 12-20 hodi akumula familia PNTL hotu”, dehan MI
Governate ne’e, husu membru PNTL hotu tenke iha prinsipiu ida hodi kaer ba regra disiplina, loial ba estadu hodi servisu deit ba povu.
“Ita hotu ne’ebé iha ne’e atu ajuda estadu no povu, hodi hametin liu tan paz no estabilidade iha ita nia rai doben ida ne’e. Fo hatene ba ita boot sira hotu katak estadu fo hela komfiansa ba ita boot sira, povu fo hela esperansa ba ita boot sira tula iha kabas hodi tau matan hela sira, tanba konfiansa ne’ebé komunidade tau hela ba kabas labele halo monu leet de’it ba rai, esperansa ne’ebé tau tanba fiar ita boot sira“, Nia hatutan
Ministru nafatin motiva ba membrus PNTL sira atu hatudu sira nia serbisu ho disiplina, Pontualidade, Asesuidade, Responsabilidade, Hirarkia Servisu, Loialidade no Performansia ne’ebé maka di’ak iha servisu fatin no iha terenu.
Fatin hanesan Pedro Belo, husu ba membru PNTL hotu atu prega PNTL iha fuan no mantein disiplina hodi serbí estadu.
“Husu mantein disiplina obedese ba hirarkia hahu husi postu Ajente to Komisariu Jeral kuandu hetan malu kumprimenta ho kontinensia. PNTL ne’e ida deit no tenke iha disiplina, PNTL ne’e prega iha fuan, kargu tau iha bolsu no responsabilidade tau iha kabas nune’e hodi serbí Estadu ho di’ak. Se wainhira asumi kargu labele prega ba fuan tanba ema dada sai fuan sei kanek”, Dehan Segundu Komandante Jerál Pedro Belo
Iha okajiaun ne’e Ekipa Juri ba Promosaun Tranzitoriu PNTL nian ne’ebé kompostu husi Ministeriu Interiór no Ekipa husi Komandu Jeral PNTL, hala’o esplanasaun ba Komandante Komandu PNTL munisipiu Ainaro Superintendente Assistente Polísia Luis da Silva ho estrutura tomak, kona-ba definisaun rezimi kareira, mekanizmu promosaun hosi alto, medio no baixo, no-mos kestaun tekniku kona-ba kriteria balu hodi muda strututura diviza ba membrus PNTL sira tuir dedikasaun exclusivu no grau ne’ebe termina ona.
Jornalista : Lian Orluli
Editor : Lian Orluli
