Lian Orluli — Autoridade Munisípiu Ainaro(AMA) sei establese tan postu administrativu ida ho naran Dom Martins, sei akomula suku hat husi postu administrativu Maubisse nian
Objetivu hari’i, posto Administrativu foun, Bazeia ba Lei konstituisional, RDTL, artigo 5 ko’alia konaba poder lokál no artigo 72 konaba poder lokál, núne’e mós Lei N° 11/2009, 6 de Outubro konaba divuzaun administrativu Territóriu, maka fo biban ba Autoridade no lukleu sira, iha Suku Edi, Mau-Lau, Manelobas no Manetu, hodi Instalasaun komisaun ida iha loron 23 Fulan Novembro 2022, hó protidaun hadia proposta propoin ba autoridade posto Administrativu, Munisípio no ba governo central liu husu Ministério Administrasaun Estatal hodi deside no tetu hari’i posto Administrativo foun Dom Martins iha Suku Mau-Lau
Iha dialogu ne’e Autoridade Munisípiu munisípiu Ainaro Manuela Georina Carmo Bucar Corte-Real hatete, inisiativa harii tan postu administrativu ida iha Munisípiu Ainaro, husi Komunidade iha suku hat nian, tanba hare ba area kobertura ho jeografiaka no nia distansia, antes ne’e Komunidade no intelektual sira tau fiar ona ba malu hodi prepara ona proposta iha VIII goveno, maibé la konsege realiza tanba la tuir regras.
“Hare area kobertura bo’ot, ho geografikamente, distancia ba to’o maubisse do’ok, ho ida ne’e mak komunidade suku hat, no lideransa komunitariu inkluí intelektual sira iha inisiativa no tau fiar ba malu hodi prepara proposta hato’o ba iha VIII governo, maibe la tuir regras, no nia prosesu paradu tia, hó nune’e mai fali iha IX governo, rona fali informasaun ne’e husi administrador postu administrativu maubisse, Etaun hakarak prosesu ne’e hahú fila, hó ida maka ita hala’o dialogo hó komunidade, intelektual, veteranos, Juventude sira hodi rona direita sira prekupasaun no hakarak tomak konaba harii postu administrativu ne’e”, Dehan PAM.(02/03/2025)
Iha fatin hanesan Xefe suku Mau-lau Julio Martins, Senti kontinente ho establese postu ne’e nune’e bele hakbesik liu tan ba komunidade
“Senti kontinente ho establese postu ne’e, bele hakbesik liu tan ba iha komunidade sira”, Dehan Xefe Suku Mau-Lau
Entertanto Prosposta konaba hari’i posto Administrativo Dom Martins sei hala’o tuir prosesu hodi hetan konsiderasaun husi Asembleia Posto Administrativu (ASPA), ba iha konseillo Koordenasaun , Konseillo Konsultivu aprova , hafoin ba to’o iha Ministerio Administrasaun Estatal. Suku hat ne’ebé aposta proposta maka Suku Mau-Lau, Manetu,Manelobas no suku Edi, ho totál populasaun rihun Sanulu resin rua resin (12 mill ital)
Iha Dialogu ne’e, Prezidente Autoridade Munisípio Ainaro, akompña husi Deputado Oscar de Araújo, Sekretáriu Administrasaun e Finansas, Ruivo Barros Magno, Sekretáriu Assunto Sociais e Organizasaun Agostinho Doutel Sarmento, Prezidente Interino CCLN Munisípio Ainaro, Administrador Posto Administrativu Maubisse, Komandante PNTL Es-Quarda Maubisse, Reprezentantes Partido Politikus, Intelektual, Veteranos, Xefe do suku inklui mos Komunidade Suku 9, partisipa Masimu iha Diálogo Estabelesimento Posto Administrativu Dom Martins nune’e hodi Aposta ba Dezentralizasaun no Poder Lokál iha Suku Mau-Lau, Maubisse
Jornalista : Sarah
Editor : Lian Orluli
