Lian Orluli, 3 Marsu 2026– Prezidente CMCLN Augosto “Tara” elojia joven sira-nia inisiativa hodi promove figura veteranu sira ne’ebé sakrifika no fó sira-nia vida ba libertasaun Timor-Leste no ninia estabelesimentu nu’udar Repúblika Demokrátika Timor-Leste (RDTL).
Deklarasaun ne’e hato’o iha eventu ne’ebé hala’o iha loron 3 fulan Marsu hafoin vizita expozisaun fotografia figura veteranus iha Ainaro ,Prezidente CMCLN subliña papél importánsia jerasaun foun sira nian hodi prezerva no hatutan valór luta veteranu sira nian ba jerasaun tuirmai.
Iha fatin hanesan Prezidente Autoridade Municipu Ainaro (PAM) afirma katak joven sira presiza halo tan peskiza ba istória figura veteranu sira ne’ebé marka ona marku signifikativu iha dezenvolvimentu nasaun RDTL.
“Foin-sa’e sira presiza peskiza istória figura veteranu sira Ainaro nian ne’ebé luta hodi liberta rai ida-ne’e. Liután, sira tenke aprende kona-ba veteranu sira ne’ebé kaer kargu militár no sivíl, tanba sira maka figura sira ne’ebé marka marku importante sira iha istória nasaun doben ida-ne’e nian,” dehan PAM.
Nune’e mos veteranus sira rekomenda ba CMCLN Ainaro iha futuru tenke halo dokumenta no promove veteranu sira-nia papél iha eventu istóriku hotu-hotu liu-liu eventu komemorasaun loron veteranus. Etapa ida ne’e konsidera inportante atu garante valor luta veteranus no matiris sira istória, moris nafatin iha memória koletiva komunidade nian.
Atividade ne’e realiaza, tanba ekipa joventude husi Media Lian Orluli kopera ho joventude husi bairo Tanqui no apoiu finanseiru husi komisaun organisadora.
Jornalista: Carla / Lucia / Delia
Editor: Clementina Fatima
