Lian Orluli, 5 Mei 2026 — Ministériu Finansas, liuhosi Diresaun Jerál Orsamentu no Finansas, hala’o konsulta públika kona-ba preparasaun Orsamentu Estadu 2027 (OJE) iha Munisípiu Ainaro. Atividade ne’e ho objetivu atu haforsa partisipasaun públiku iha prosesu planeamentu no orsamentasaun nasionál.
Diretór Jerál Orsamentu no Finansas, José Alexandre de Carvalho, subliña katak envolvimentu públiku nu’udar elementu krusiál hodi garante katak polítika governu nian aliña ho nesesidade reál sira iha terrenu.
“Konsultasaun ne’e sai hanesan meius ida hodi halibur hanoin públiku nian no enkoraja envolvimentu ativu governu munisípiu nian iha prosesu preparasaun OJE 2027 tomak,” dehan José iha abertura enkontru koordenasaun iha Ainaro.
Nia haktuir katak input husi públiku no governu lokál presiza atu nune’e governu sentrál bele identifika setór prioridade sira ne’ebé presiza atensaun iha dezenvolvimentu rejionál iha futuru.
Jose subliña mós katak, Oitavu Governu Konstitusionál iha kompromisu atu envolve komunidade iha foti desizaun estratéjiku. Nia hatete aprosimasaun ida-ne’e krusiál atu asegura programa no polítika sira governu nian sai alvu liu no aliña ho nesesidade prioridade komunidade nian.
Liu tan, nia husu ba diresaun servisu hotu iha nivel munisipiu atu tau atensaun seriu ba prosesu planeamentu dezenvolvimentu mediu prazu, partikularmente ba tinan rua to’o lima oin mai.
“Planeamentu klean sei ajuda asegura dezenvolvimentu sai efetivu liu, foka liu, no sustentável liu,” nia hatete.
Entretantu, Prezidente Autoridade Munisípiu Ainaro, Manuela Georgina Carmo Bucar Corte-Real, destaka importánsia koordenasaun entre governu lokál no ministériu sira hodi determina diresaun dezenvolvimentu rejionál.
Iha nia diskursu, Manuela haktuir katak enkontru ne’e estratéjiku tanba fó oportunidade ba governu sentrál atu rona diretamente kona-ba nesesidade no prioridade setór sira iha Ainaro.
Nia mós husu ba diretór servisu munisípiu sira atu atende ho kuidadu aprezentasaun hotu-hotu atu nune’e programa ida-idak ne’ebé propoin bele komprende ho loloos no implementa ho efetivu.
Liután, Manuela hato’o nia esperansa katak Ministériu Finansas no Planeamentu sei fó atensaun liután ba proposta programa oin-oin husi governu lokál.
“Ami hein katak ministériu bele konsidera nesesidade loloos hosi povu iha rejiaun ida-ne’e, tanba dalabarak programa sira ne’ebé ami propoin labele akomoda iha orsamentu nasionál”, nia hatete.
Sorumutu ne’e mós sai nu’udar abertura ofisiál ba diskusaun entre setór ne’ebé hein atu hametin koordenasaun entre governu sentrál no rejionál no prodús polítika dezenvolvimentu ne’ebé responde liu ba nesesidade komunidade iha Munisípiu Ainaro.
Jornalista : Carla/ Elfiana
Editor : Clementina Fatima
