Lian Orluli – Iha dezenvolvimentu teknolójiku sira ne’ebé lais liu iha sékulu XXI nian, Danila Soares De Araújo hanesan joven ida ne’ebé ativamente promove komprensaun teknolójiku entre estudante sira iha Timor-Leste. Estudante ida iha Fakuldade Enjeñaria no Siénsia, ho espesializasaun iha Siénsia Informátika ho espesializasaun iha Intelijénsia Artifisiál (IA), Universidade DIT, nia serbisu voluntáriu ativu ba mídia lokál ida iha Ainaro, “Media Lian Orluli.”
Ba Danila, serbisu voluntáriu la’ós de’it atu serbí komunidade, maibé mós oportunidade ida atu fahe koñesimentu no esperiénsia ne’ebé nia hetan durante iha nia edukasaun iha área teknolojia.
Koñesimentu primáriu ne’ebé nia espera atu fahe ho estudante no estajiáriu sira iha Eskola Téknika Vokasionál Ainaro, partikularmente sira ne’ebé iha espesialidade iha Siénsia Informátika, mak Intelijénsia Artifisiál (IA).
Tuir Danila, mundu agora daudaun tama iha era globalizasaun dijitál, iha ne’ebé kuaze setór hotu-hotu moris nian adota teknolojia modernu. Tanba ne’e, jerasaun foun presiza komprende teknolojia husi idade ki’ik atu bele kompete no buras iha futuru.
“Iha sékulu 21 ida-ne’e, mundu hahú adota teknolojia. Tanba ne’e, ha’u hakarak fahe ha’u nia esperiénsia sira ho estudante sira kona-ba oinsá atu komprende teknolojia no IA, no oinsá atu uza IA ho efetivu liuhosi koñesimentu ho edukasaun,” dehan Danila.
Liu husi nia serbisu voluntáriu iha Media Lian Orluli, Danila ajuda introdús báziku sira kona-ba teknolojia dijitál, utilizasaun komputadór, no komprensaun kona-ba intelijénsia artifisiál ba estajiáriu sira. Nia hein katak estudante sira sei la’ós de’it sai utilizadór teknolojia nian maibé mós komprende benefísiu no utilizasaun IA nian ho pozitivu no responsável.
Danila nia viajen edukativu hahú iha EBC Tatire La-Ses, hafoin kontinua ba terseiru siklu ensinu bajiku iha Boetua Dare Ainaro. Nia interese iha teknolojia hahú buras iha idade ki’ik.
“Ha’u estuda enjeñaria sivíl ho ha’u nia aman bainhira sei ki’ik, enkuantu iha terseiru siklu ensinu báziku nian iha Boetua Dare Ainaro, nune’e ha’u hetan introdusaun ba siénsia informátika iha Eskola Sekundária Katólika Saun Miguel,” nia hatete.
Nu’udar oan boot liu hosi oan na’in hitu, ne’ebé moris hosi Celestino Soare Mendonca no Helena De Araujo, Danila nudar oan feto boot ida ne’ebé independente, badinas, no iha karakter úniku no tomboy ne’ebé halo nia diferente hosi nia alin sira.
Bainhira estuda iha Universidade DIT, Danila mós luta atu buka moris rasik hodi ajuda selu nia estudu, maski hetan apoiu tomak husi nia família.
Danila nia paixaun atu fahe nia koñesimentu kona-ba AI no teknolojia sai hanesan inspirasaun ba jerasaun foun sira iha Ainaro. Nia fiar katak edukasaun no teknolojia bele loke oportunidade foun ba joven sira iha Timor-Leste atu buras no hasoru dezafiu sira iha mundu modernu nian.
Ekipa : Redasaun
