Lian Orluli 14,Maio, Hato-builico – Dezastre naturais ne’ebe kona Aldeia Tatiri, Suco Mulo, Posto Administrativo Hato-buliko, Munisípiu Ainaro, husik hela tristeza ne’ebe klean ba komunidade Tatiri. Maizumenus família uma kain hamutuk 15 maka afetadu hosi akontesimentu ne’e, ho detallu hosi família 9 hetan estragu kmaan, enkuantu família 6 hetan estragu maka’as.
Ba jornalista, vitima dezastre naturais, Antonio da Silva Pereira, hato’o nia laran triste tanba estragus ne’ebe kona nia kios. Tuir Antonio, dezastre ne’e estraga nesesidade báziku sira ne’ebé durante ne’e sai fonte ba nia família nia rendimentu.
“Fos no nesesidade seluk hetan estragus hotu. To’o osan balun lakon tanba dezastre ne’e,” dehan Antonio ho lian triste.
Antonio kalkula katak lakon totál Osan no sasan negosiu ne’ebé nia sofre maka besik $ 5,000. Nia rekoñese katak susar tebes atu hahú fali nia negósiu tanba kioske ne’e maka família nia fonte rendimentu prinsipál.
“Hau espera governu bele ajuda ami nune’e ami bele buka moris fali hodi sustenta ami nia familia no haruka ami nia oan sira ba eskola,” nia husu.
Tanba ne’e, Antonio da Silva Pereira husu atensaun sériu husi governu, liu-liu ministériu relevante sira, atu fó apoiu asisténsia ba vítima dezastre sira.
Maibé, hafoin akontese dezastre naturais, fatin sira ne’ebé afeitadu, vizita husi Xefe Suco Mulo, APC (Autoridade Proteção Civil) Munisípiu Ainaro, no CVTL Filial Ainaro hodi hare’e direitamente kondisaun komunidade nian. Komunidade sira hein katak vizita ne’e sei la’ós de’it hanesan formalidade ida, maibé sei tuir ho pasu konkretu sira iha forma asisténsia lojístika, reabilitasaun uma nian, no apoiu ekonómiku ba família sira ne’ebé hetan estragu maka’as.
Enkuantu Autoridade Munisípiu Ainaro liu husi sekretáriu Assunto Sosial Agostinho Doutel Sarmento Hatete, intervensaun governu lokál apoiu emerjensia no sei kontaktu MOP hodi normál iha estrada ne’ebé nakonu ho fatuk kauza husi erosaun.
“Depois de oferese ajuda emerjensia ba família afetado, ami mós informa ona ba komunidade sira katak MOP sei organiza ekipamentu pezadu sira, hodi normál iha hikas estrada iha Eradoko ba to iha Haraufe Tatiri” Dehan Agostinho, Secretário Assuntu Sosial Autoridade Munisípiu Ainaro
Povu Aldeia Tatiri oras ne’e hein hela atensaun sériu husi governu sentrál no governu lokál atu nune’e prosesu rekuperasaun ne’e bele hala’o no abitante sira nia moris bele fila fali ba normál.
Ekipa :Redasaun
