Lian Orluli Mauchiga, 13 Maiu 2025 — Estrada ne’ebé liga Dare Mauchiga ba Lesuhati iha perigu atu kotu hafoin udan-boot loron haat tuituir malu kauza estragu maka’as ba estrada no ponte ki’ik ida, hodi difikulta mobilidade ba komunidade sira.
Xefe Aldeia Mauchiga, Abrao de Araújo, haktuir katak bazeia ba observasaun iha loron haat nia laran iha tempu udan, estrada no ponte ki’ik balun hetan estragus maka’as, nune’e difikulta abitante atu hala’o sira nia atividade ho transporte.
“Iha Mauchiga, liu-liu iha estrada prinsipál sira no ponte ki’ik ida udan maka’as iha loron haat ikus ne’e hamosu estragu maka’as, halo movimentu komunitáriu no atividade jerál sira susar tebes“, nia hatete.
Lider komunitáriu ne’e husu ba governu relevante, partikularmente Ministériu Obras Públikas (MOP), atu atende kedas situasaun emerjénsia ne’e no hadi’a fali infraestrutura ne’ebé hetan estragu atu públiku bele hetan hikas asesu ba estrada refere.
“Tanba ne’e, lideransa komunitária sira husu ba Departamentu Obras Públikas atu atende situasaun emerjénsia ne’e no restaura kedas estrada ne’e ba funsionamentu normál atu nune’e públiku bele hahú hikas nia utilizasaun,” akresenta Abraon.
Entretantu, abitante Juanico husu ba governu atu hadi’a kedas estrada no ponte sira ne’ebé hetan estragus, tanba maioria abitante sira depende ba fa’an produtu agríkola iha merkadu Manufahi no Ainaro hodi moris.
“Ami nia moris depende ba fa’an ami nia produtu iha merkadu. Maski iha tempu udan, ami tenke ba nafatin merkadu hodi hatán ba ami nia nesesidade uma-laran nian. Ami nia oan sira mós presiza asesu ba eskola, tanba ne’e karik estrada sira la hadi’a lalais, ami preokupa tebes,” nia hatete.
Estrada ne’ebé liga Dare, Mauchiga, no Lesuhati hetan estragu maka’as tanba udan ne’ebé la para durante loron haat. Enkuantu Totál populasaun hosi aldeia lima ne’ebé uza estrada ne’e hamutuk 4.597, kompostu hosi mane 2.304 no feto 2.293.
Jornalista: Carla/Lucya/Elfiana
Editor: Clementina Fatima
