Lian Orluli 17/05/26- Feto Foinsa’e Na’in Tolu Hanesan Arbitru Futsal iha Selebrasaun Loron Festa Paroquia Ainaro. Ba selebrasaun Loron Festa Paroquia nian tinan ida ne’e ho prezensa hosi feto foin-sa’e na’in tolu ne’ebé hetan konfiansa atu ofisializa jogu futsal entre suku sira. Sira maka Lucia dos Santos Ximenes, Carla Ximenes Xavier, no Gemila da Costa Campos.
Sira na’in tolu ne’e mosu konfiante bainhira sira lidera jogu futsal hodi selebra Loron Festa Paróquia nian iha Ainaro. Sira nia prezensa hetan atensaun no apresiasaun husi komunidade no partisipante sira, hatudu katak feto foin-sa’e sira iha kapasidade atu hala’o papél importante sira iha desportu. Uza farda árbitru nian, Lucia, Carla, no Gemila mosu firme no profisionál bainhira sira foti desizaun sira iha kampu. Maski sira nia idade sei ki’ik, sira konsege mantein atmosfera ida ne’ebé justu no ordenadu iha jogu.
Arbitru na’in tolu antes ne’e hetan formasaun husi Federasaun Futeból Timor-Leste (FFTL) ne’ebé organiza husi AF-RAMA
Organizadór eventu ida hatete katak envolvimentu hosi foin-sa’e sira, simboliza entuziazmu ne’ebé hafoun fali ba atividade igreja no desportu nian iha paróquia.
Aleinde hametin amijade iha kongregasaun nia leet, torneiu futsal ne’e mós fó plataforma ida atu dezenvolve talentu no konfiansa ba jerasaun foun sira. Selebrasaun Loron Paróquia tinan ida ne’e moris tebes, ho atividade espirituál, kulturál, no desportivu oioin ne’ebé envolve ema husi suku oioin iha Ainaro.
Iha Prezensa hosi árbitru joven na’in tolu ne’e inspira ona adolexente barak seluk atu ativu no aten-barani nafatin hodi asume papél pozitivu sira iha sosiedade.
Jornalista: Lucya/Carla
Editor: Clementina Fatima
