Lian Orluli, 02 Juñu – Gabinete Prezidênsia da Repúblika, Diresaun Sosiedade Sivíl. kontinua hatudu ninia preokupasaun ba maluk sira ne’ebé presiza. Liu husi Assesór prinsipál Quintiliano Moniz Carvalho, ho nia ekipa, sira vizita Mavia nia uma, ema ida ho defisiénsia fíziku totál, hodi avalia família nia situasaun no fó apoiu nesesáriu.
Iha vizita ne’e, Prezidente Repúblika nia ekipa fornese nesesidade báziku ba Mavia ho nia família nu’udar sinál preokupasaun ba sira-nia moris loro-loron. Vizita ne’e mós ho objetivu atu rona diretamente kona-ba nesesidade no dezafiu sira ne’ebé Mavia nia família hasoru.
Família Mavia hato’o agradesimentu no agradesimentu kle’an ba Prezidente Repúblika nia atensaun no apoiu. Sira konsidera asisténsia ida-ne’e hanesan demonstrasaun importante ida hosi preokupasaun estadu nian ba nia komunidade sira ne’ebé presiza atensaun espesiál.
Iha biban hanesan, Xefe Suku Manutasi, Manuela Caldas, hato’o mós ninia apresiasaun no agradesimentu ba Prezidente da Repúblika. Nia subliña nia kompromisu atu kontinua kolabora ho parte sira hodi apoia moris di’ak ba komunidade hahú husi nia aldeia, liu liu família vulneravel sira.
“Agradese no obrigadu ba Mai Prezidente da Repúblika ho nia ekipa tulun ona ami nia maluk ne’e ho nia família“, Dehan Lideransa Komunitariu suku Manutaci
Asesor prinsipál ba Gabinete Sosiedade Sivíl nian,Quintiliano esplika katak vizita ne’e la’ós de’it foka ba fó asisténsia ba nesesidade bázika, maibé mós parte ida husi esforsu atu kompriende didi’ak situasaun no nesesidade Mavia no ninia família nian.
“Vizita ne’e ho objetivu atu fó apoiu diretu ba nesesidade báziku família nian, enkuantu identifika mós nesesidade familia nian ne’ebé presiza atensaun no testamentu. Ami mós koordena hela ho lideransa komunitária suku nian hodi garante apoiu ne’ebé fó ne’e sustentável no iha alvu di’ak, inklui mós apoiu prezidente nian sei konstrui uma na’in ida ba familia, husi nafatin koordenasaun di’ak entre lideransa Komunitariu ho komunidade nune’e bele tulun konstrui uma ne’e, nai Prezidente Da Repúblika sei apoiu material konstrusaun uma ne’e maibé lideransa Komunitariu ho nia komunidade maka sei tulun halo uma ne’e ba família Mavia” dehan Dehan Asesor Quintiliano.
Nu’udar kompromisu ba tempu naruk, Gabinete Sosiedade Sivíl Prezidente Repúblika promete ona apoiu ba konstrusaun uma ne’ebé dignu ba Mavia ho nia família. Liután, sei fornese kios ki’ik ida ba Mavia nia bin ne’ebé ne’ebé ne koidado nia, ho dedikasaun atu tau matan ba Mavia, nune’e ajuda hadi’a situasaun finanseira família nian.
Ba oin sei presiza nafatin apoiu husi parte oin-oin, inklui governu no komunidade, hodi realiza konstrusaun uma no hametin moris diak familia nian. Hein katak inisiativa ida ne’e sei sai nu’udar ezemplu konkretu ba espíritu solidariedade no preokupasaun sosiál hodi harii moris di’ak ba sidadaun hotu-hotu.
Vizita ne’e reflete kompromisu Prezidente Repúblika nian liuhosi Gabinete Sosiedade Sivíl atu prezente iha komunidade nia leet, rona sira-nia nesesidade diretamente, no garante katak asisténsia ne’ebé fó la’ós temporáriu de’it, maibé mós iha kapasidade atu kria mudansa pozitiva ne’ebé sustentável ba família benefisiária sira.
Ekipa Redasaun
