Lian Orluli – Prezidente Autoridade Munisípiu Ainaro Manuela Georjina Carmo Bucar Corte-Real, ofisialmente hala’o ona serimónia Lansamentu ba konstrusaun Merkadu Maubisse, ne’ebé lokaliza iha Postu Maubisse. Iha eventu ne’e marka inísiu konstrusaun merkadu nian, ne’ebé reprezenta inisiativa governu lokal nian atu hadi’a infraestrutura ekonómika lokál no apoia kreximentu negósiu komersiante lokál sira-nian.
Iha nia diskursu, Prezidente Autoridade Munisípiu Ainaro haktuir katak konstrusaun Merkadu Maubisse hanesan parte ida husi kompromisu governu lokal nian atu fornese fasilidade komérsiu no konfortavel.
Nia nota katak Merkadu Maubisse hala’o papél estratéjiku nu’udar odamatan ba Munisípiu Ainaro, tanba hanesan área dahuluk ne’ebé komunidade no vizitante sira tama ba Ainaro.
Prezidente Autoridade Munisípiu Ainaro hato’o esperansa katak konstrusaun merkadu ne’e sei hasa’e atividade ekonómika lokál, hasa’e moris di’ak negosiante sira nian, no kria ambiente komérsiu ne’ebé organizadu liu. Aleinde ne’e, prezensa merkadu ida ne’ebé loloos no dezeña ho di’ak hein atu apoia esforsu sira governu lokal nian hodi hadi’a servisu públiku sira no mitiga kestaun sosiál sira ne’ebé bele mosu iha área komérsiu sira.
“Governu hein katak prosesu konstrusaun ne’e la’o ho di’ak no kompleta tuir planu, hodi garante benefísiu ne’ebé diak, kompania bele realiza lalais no kompleta tuir Palnu”, Dehan PAM Manuela (07/07/2026)
PAM Husu ba Administrador Postu Administrativu Maubisse, Xefe Aldeia no Komunidade sira atu akompanha prosesu konstrusaun Merkadu ne’e, atu nune’e kompanha bele ezekuta obra ne’e tuir kalendario de ezekusaun no tuir BOQ hodi garante kualidade no tuir tempu de kontratu.
Diretór LOKOBUI ZACMA Unipessoal Lda hato’o apresiasaun no agradesimentu ba Autoridade munisipal ba konfiansa ne’ebé fó ba kompañia hodi ezekuta projetu konstrusaun Merkadu Maubisse.
Nia subliña kompromisu empreza nian atu fó kualidade, no lao tuir Bill of Quantities (BOQ) no espesifikasaun téknika sira ne’ebé estabelese ona. Aleinde ne’e, faze konstrusaun sei hala’o ho profisionál no tuir kalendáriu nomos prazu kontratu nian ne’ebé konkorda ona.
“Ami agradese ba Governu ba konfiansa ne’ebé fo ba kompania LOKOBUI ZACMA Unipessoal Lda. Ami sei fó onra ba konfiansa ida-ne’e hodi entrega obra ho kualidade, kumpre espesifikasaun BOQ no kompleta projetu tuir tempu ne’ebé maka hakerek iha kontratu”, afirma Diretór Kompania LOKOBUI ZACMA Unipessoal Lda.
Nia hatutan katak konstrusaun ne’e sei susesu iha Merkadu Maubisse nian hein katak sei fó benefísiu ba komunidade, espesial iha Maubisse hodi hasa’e atividade komérsiu sira no dudu kreximentu ekonómiku iha Munisipiu.
Enkuantu Konstrusun Merkado Maubisse ho Montante Orsamento $ 480,928.37 ho Durasaun Fulan 6 Hahu Husi 03 Junho 2026 No Remata Iha 03 de Fevreiro 2027.
Jornalista : Elfiana/ Nato RAKOM Mauloko
Editor : Clementina Fatima
