Lian Orluli, Mauchiga, 24 Agostu 2026- Juventude husi Suku Mauchiga, Postu Ainaro, Munisípiu Ainaro, hatudu sira-nia orgullu kona-ba istória luta povu Timor-Leste, liuliu memória kona-ba luta iha Mauchiga–Dare, ne’ebé sai parte importante husi istória rezisténsia Timor-Leste.
Pedro Caldas, joven husi Mauchiga, hateten katak nia sente orgullu bainhira mídia mai dokumenta no hato’o istória komunidade ba públiku. Ba nia, memória ne’e importante tebes, tanba bele ajuda jerasaun foun komprende istória no sakrifísiu ne’ebé jerasaun uluk liu husi.
“Ha’u hanesan juventude sente orgullu tebes tanba mídia bele mai foti ami-nia istória ida-ne’e atu fó sai ba públiku. Ohin loron importante ba FALINTIL, no iha territóriu Timor-Leste tomak ema bele haree no hatene ami-nia istória,” Pedro hateten.
Pedro subliña katak juventude tenke kontinua tau matan ba memória istórika no servisu hamutuk ho autoridade lokal, veteranu no komunidade atu harii futuru ne’ebé di’ak liután.
“Hanesaun juventude, ami nafatin iha esperansa atu servisu hamutuk ho autoridade Suku Mauchiga, veteranu no juventude Loriku Asuain. Ami fiar katak, liuhusi servisu hamutuk, ita-nia esperansa ba futuru bele sai di’ak liután,” nia hatutan.
Ba Pedro, luta no sakrifísiu husi jerasaun uluk la’ós buat ida ne’ebé bele haluha. Nia konsidera katak liberdade ne’ebé Timor-Leste hetan ohin loron mai husi luta naruk no sakrifísiu husi povu Timor-Leste.
“Hanesaun joven iha Suku Mauchiga, ami sente orgullu tebes. Luta ne’ebé sira halo atu liberta ita-nia Pátria la fasil, la’ós hanesan prémiu ne’ebé ema ida bele oferese ba ema seluk. Ami-nia orgullu mak sira-nia luta, tanba luta ne’e mak sai parte husi ita-nia istória no ita-nia identidade,” Pedro afirma.
Memória kona-ba Mauchiga–Dare, inklui eventu 20 Agostu 1982, kontinua sai importante ba jerasaun foun atu aprende kona-ba istória, valoriza sakrifísiu husi jerasaun uluk no transforma memória ne’e sai inspirasaun ba konstrusaun futuru Timor-Leste.
Juventude Mauchiga espera katak memória istórika sei kontinua preserva no hato’o ba jerasaun sira tuirmai, la’ós de’it hanesan lembransa kona-ba pasadu, maibé mos hanesan responsabilidade atu hametin unidade, solidariedade no esperansa ba futuru.
Jornalista : Elfiana
Editor : Clementina Fatima
