Husik hela inan aman iha knua moris fatin hakat sai ba buka bukae Matenek iha Kapital Nasaun nian.
Bensa Mama,
Husu Orasaun akompaña hau.
Bensa Papa,
Husu hamulak nune’e Matak malirin nafatin horik ho hau.
Ba sa loron ba loron Fulan ba Fulan Tinan ba Tinan hau liu Mesak hodi hasoru moris ne’e.
Iha Loro-matan nia manas nahas hau hodi hakat ho Oin nakonu ho kosar belit ho rairahun Cidade nian.
Iha udan nia laran malirin hau hakat ho tahu liu ho bokon no hakur inundasaun bot Cidade nian iha sikun ba Sikun lidun ba lidun.
Papa Mama
Iha ne’e hau Mesak hasoru moris ne’e.
Maske, senti triste atu tanis maibe hau atu satan ba se no ba se mak hau atu hamaran matawen ne’e no se mak hau atu konta sofrementu ne.
Nonok la ho lian halerik atu ema hotu rona, iha nonok ida ne’e hau iha mehi ne’ebé mak bot ba Futuru ne’ebé nabilan.
Saudades tebes Papa ho Mama
Maibe hau tenki forsa, Ba sa Hau sei troka sofrimentu ne’e ho Liafuan Sucesso.
Hau knua Moris fatin hein hela Hau
Hau sei fila fali ba hodi Servi,
Hau mak fini rai lulik ne’e nian
Hau mak naroman rai santu nee nian
Hau mak matenek nain raik ki’ik nee nian no esperansa rai lafaek ne’e nian.
“Mário Mau-Lore Araújo”
Mau-Lore Central
08-07-2022
