Lian Orluli- Kuarta ferira ne’e 27-07-22, Administrador Munisípiu Ainaro Leovegildo Amaral Pereira, hala’o lansamentu programa maun de obra ka PMOPA ba trabalhadór 140 hodi hala’o limpeza iha Ainaro villa.
Seremonia lansamentu limpeza ne’e iha Palku Haksolok Munisípiu Ainaro. Iha seremonia ne’e hahú ho programa kuda ai sentru husi autoridade municipal Ainaro.
Administrador Munisípiu Ainaro Leovegildo Amaral Pereira hatete, ho implementasaun programa maun de obra bele hadia sidadaun siraa nia ekonomia uma-laran.
“Ho implementasaun programa PMOPA ida ne’e pelumenus ahi iha dapur bele kontinua suar, ne’e ma kami nia hanoin. Wainhira ha’u sei bele koalia tinan oin sei kontinua nafatin”,esplika Administrador Munisípiu Ainaro, Leovegildo Amaral Pereira, liu husi nia diskursu iha Palku Haksolok Ainaro.
Iha fatin hanesan Administrador Postu Administrátivu Ainaro Nazário de Araújo, agradese oitavu governu konstituisionál ne’ebé ho polítika di’ak hodi trasa planu ba implementasaun ba programa maun de obra ka PMOPA.
“Programa ida ne’e ho nia objetivu, atu kria kampu de trabalhu ba ita nia joven sira no ita nia alin feto sira ne’ebé durante ne’e hela de’it iha uma laiha servisu”,dehan Nazário de Araújo.
Nazário hatutan, objetivu seluk tan ba rekooperasaun ekonomia, tamba durante COVID-19, mai to’o agora servisu mak laiha. Ho ida ne’e mak oitavu Governu Konstitusionál, trasa nia polítika ida ne’e bele fó kampu de trabalhu ba komunidade.
Autoridade Postu Administrativu Ainaro akresenta, aktividade limpeza ne’e mós atu hala’o preparasaun hodi simu vizita Prezidente Repúblika José Ramos Horta, iha tempu besik no preparasaun ba seremonia nasionál loron proklamasaun independénsia 28 Novembru ne’ebé sei realiza iha Ainaro.
Orsamentu ba implementasaun programa ne’e ho montante $ 114,541.33
Husi orsamentu refere trabalhador sira ne’ebé servisu kada loron sei selu $ 5,00
Editor Lian : Lian orluli
