Lian–Orluli, 15 Janeiru 2026 — Projetu konstrusaun estrada ne’ebé liga Aldeia Dausur no Aldeia Aimerleu, Suku Leo-Lima ba Postu Hatu-Udo, atinji ona progresu pursentu 97.
Enjeñeiru projetu Julio Araujo Pereira afirma, konstrusaun estrada ne’ebé hala’o durante fulan rua, oras ne’e tama ona iha faze finál.
“Progresu konstrusaun atinji ona pursentu 97 no alvu atu remata iha fulan ne’e. Serbisu sira la’o normalmente to’o faze finalizasaun, no hein katak sei remata iha semana ne’e”, nia hatete.
Julio Araujo Pereira mós esplika katak totál orsamentu projetu nian hamutuk $75.377,69 ba konstrusaun estrada ho kilómetru 1.30 husi Aldeia Dausur to’o Aldeia Aimerleu.
Xefe Aldeia Dausur, Jose Lopes, hato’o nia apresiasaun ba governu, Xefe Governu Munisipiu Ainaro, no kompañia ba konstrusaun estrada refere.
“Ami agradese tanba estrada ne’e to’o iha Aldeia Dausur, Aldeia Aimerleu, no Aldeia Lese. Aldeia tolu ne’e hotu kontente tebes tanba estrada ne’e fasilita ema nia viajen ba mai,” nia dehan.
Komunidade Dausur no Amierleu haksolok ho prosesu konstruksaun estrada ne’ebe governu konstrui, bele fasilita komunidade husi suku rua ne’e asesu ho trasporte privado no publiku
“Ami Aldeia rua ne’e kontenti tebes tanba tinan barak ami laasesu estrda, agora ami bele liu husi estrda ho trasporte, nune’e ami nia produtu sira ne’ebé ami iha bele ba faan iha merkadu ho transporte”, dehan rejidente Aldeia Dausur
Projetu konstrusaun estrada ne’e uza beton kór no resin ba parte kilómetru ida husi Aldeia Dausur to’o Postu Eskola Bázika Aimerleu.
Jornalista: Lucia
