Lian Orluli Ainaro 16, Maio 2026—Fundasauan Hadomi Timor kopera ho Plan Internasionál, Fasilita formasaun kona-ba seguransa dijitál ba jornalista mídia Lian Orluli, RAKOM Mauloko inklui joven sira husi ONG NAFOFILA no MAHARU iha Ainaro.
Atividade ne’e ho objetivu atu ajuda partisipante sira komprende risku dijitál nian ne’ebé dala barak akontese, inklui ameasa ba dadus pesoál, ligasaun perigo no uza sala informasaun iha mídia sosiál. Partisipante sira mós hetan formasaun kona-ba oinsá atu mantein seguransa ba konta dijitál sira hanesan Facebook, Gmail no WhatsApp atu sira-nia privasidade proteje nafatin.
Diretor Ezekutivu Fundasaun Hadomi Timor, Abrao Monteiro Nicho Linux, nu’udar treinadoor esplika formasaun ne’e bele ajuda jerasaun foun sira hodi aproveita aspetu pozitivu husi plataforma dijitál sira sein sai vítima ba impaktu negativu husi siberespasu.
“Ami hakarak joven jornalista no traballadór mídia sira iha abilidade atu identifika ameasa dijitál sira no hatene proteje-an bainhira uza mídia sosiál ka plataforma dijitál sira,” dehan Abrao.
Diretor Ezekutivu Abrao hatutan tan, Treinamentu ne’ebé hanesan antes ne’e hala’o tiha ona iha fatin balun seluk, inklui iha Ainaro. sira haktuir katak hein nafatin konfirmasaun husi Plan Internasionál hodi kontinua programa formasaun tuir mai atu nune’e matéria hotu bele kompleta.
Venancio A. Mendonca, nu’udar partisipante hateten treinamentu ne’e importante tebes tanba fó komprensaun importante kona-ba protesaun dadus pesoál.
“Liu husi formasaun teórika no prátika ne’e, ha’u aprende oinsá garante seguransa ba ha’u nia dadus pesoál sira bainhira uza Facebook, Gmail no WhatsApp. Ha’u sente formasaun ne’e importante tebes tanba agora ha’u komprende di’ak liu oinsá mantein ha’u nia privasidade iha mídia sosiál sira”, nia hatete.
Maibé, partisipante sira mós hasoru obstákulu sira durante formasaun, liu liu problema eletrisidade ne’ebé perturba prosesu aprendizajen.
“Treinamentu ne’e la’o di’ak, maibé problema eletrisidade ne’e fó impaktu duni ba ami nu’udar partisipante, liu-liu iha loron ikus,” Venancio akresenta
Treinamentu ne’e hala’o durante loron rua ho objetivu atu hasa’e partisipante sira-nia abilidade no kapasidade iha koñesimentu ameasa dijitál no proteje-an iha espasu mídia sosiál no plataforma dijitál sira.
Jornalista: Carla/ Elfiana
Editor : Clementina Fatima
