Lian Orluli,Maubisse 13 Jullu– Komunidade Suku Manetu, iha Postu Administrativu Maubisse Munisípiu Ainaro, hato’o pedidu sira kona-ba dezenvolvimentu infraestrutura no hadi’a servisu báziku ba Prezidente Autoridade Munisípiu Ainaro durante vizita traballu iha Segunda (13 Jullu). Pedidu sira-ne’e kobre hadi’a estrada no ponte sira, espansaun rede eletrisidade nian, adisaun pesoál saúde, fornesimentu bee-moos, no hadi’a instalasaun edukasaun sira.
Durante diálogu ho ofisiál governu lokal nian, reprezentante komunidade Manetu Marcos Martins esplika katak husi parte estrada urbana ne’ebé sai hosi Aldeia Lemluli ba estrada nasionál ne’ebé liga ba Postu Administrativu Turiscai hetan estragus maka’as.
“Ami nia problema durante ne’e maka hasoru liu problema iha strada urbana ne’ebé liga husi Aldeia haat iha suku Manetu ba Postu, situasaun ne’e sai aat liután tanba ponte sira presiza hadi’a no parte estrada sira ne’ebé sai difikulta atu atravesa durante tempu udan”, dehan Marcos iha vijita servisu PAM Ainaro.
Aleinde kestaun infraestrutura sira, komunidade sira relata ona katak aldeia haat maka seidauk asesu ba eletrisidade. Sira hein katak governu sei habelar rede elétrika hodi asegura servisu ekuitativu ba komunidade hotu-hotu.
Kona-ba setór saúde, rezidente sira husu ona atu aumenta pesoál saúde iha Postu Saúde Manetu hodi hadi’a kualidade servisu. Sira mós haree ba governu atu rezolve falta asesu ba bee-moos ne’ebe sai nesesidade loron-loron nune’e mos habelar fasilidade eskola primária iha Manetu hodi apoia kualidade edukasaun ne’ebé di’ak liu iha suku Manetu.
Hatan ba aspirasaun ne’e, Prezidente Autoridade Munisipiu Ainaro haktuir katak vizita terrenu ne’e hala’o hodi rona direitamente komunidade nia nesesidade, hodi garante katak kestaun sira ne’ebé hato’o bele sai hanesan baze hodi formula programa dezenvolvimentu nune’e sei hato’o ba Governu Sentrál.
“Ha’u haksolok tebes ohin vizita Manetu hodi haree diretamente kondisaun ne’ebé komunidade hasoru. Ami hakarak rona diretamente hosi inan-aman sira kona-ba kestaun no preokupasaun Sira ne’ebé sira hasoru, atu nune’e ami bele uza informasaun sira-ne’e hanesan baze hodi formula planu hodi hato’o ba Governu Sentrál”, dehan Prezidente Autoridade Munisípiu Ainaro.
Nia subliña katak IX Governu Konstitusionál, lidera hosi Primeiru-Ministru Kay Rala Xanana Gusmão, kontinua fó prioridade ba dezenvolvimentu infraestrutura bázika sira inklui fornesimentu bee-moos, eletrisidade, estrada, ponte, no servisu atendementu saúde nian no mós setór agríkola, nu’udar parte ida hosi esforsu sira atu hadi’a bem-estar públiku.
Iha vizita ne’e hetan partisipasaun husi Sekretáriu Munisipál Asuntu Sosiál no Organizasaun, Diretór Servisu Munisipál, Delegadu Rejionál sira, Komandante PNTL Maunisipiu Ainaro, Administradór Postu Administrativu Maubisse, Xefe Gabinete Prezidente Autoridade Munisípiu Ainaro, xefe departamentu sira, funsionáriu governu lokal, xefe aldeia sira, inklui lia-nain sira no veteranu sira, no iha mos reprezentante juventude sira, no komunidade sira husi Aldeia Manetu.
Jornalista: Carla/RAKOM Maubisse
Editor : Clementina Fatima
