Lian Orluli Ainaro 14 Agostu 2026 – Emprejariu Lokal Kritika Prosesu PDIM Ainaro ihaAlegasaun kona-ba favoritizmu, partidarizasaun no konflitu interese iha prosesu klasifikasaun no atribuisaun projetu PDIM Munisípiu Ainaro presiza hetan klarifikasaun públika.
Emprezáriu hosi HABURAS SARAI. LDA, Mario Nunes Simenes, kritika prosesu aprovasaun no atribuisaun projetu Programa Dezenvolvimentu Integradu Munisípiu (PDIM) iha Munisípiu Ainaro. Nia alega katak iha indikasaun favoritizmu, partidarizasaun no konflitu interese iha prosesu ne’e.
Mario hateten katak, tuir nia observasaun, balu hosi projetu PDIM tinan 2025 seidauk remata, maibé kompania balu hetan tan projetu ba tinan 2026.
“Projetu PDIM tinan 2025 iha tolu mak seidauk remata. Maibé iha kompania balu ne’ebé hetan tan projetu ba tinan ida-ne’e,” dehan Mario.
Kritika klasifikasaun no prosesu avaliasaun
Mario mós husu transparénsia kona-ba prosesu klasifikasaun, avaliasaun no atribuisaun projetu. Nia konsidera katak prosesu ne’e presiza klaru, liuliu kona-ba oinsá komisaun avalia kompania sira no determina klasifikasaun.
Nia mós alega katak iha projetu balu ne’ebé nia haree hanesan bele iha ligasaun ho familia ka ema sira iha estrutura autoridade munisípiu.
“Hau husu kona-ba lei ne’ebé uza atu prevene situasaun sira ne’e. Se iha ema nain tolu hosi nain sia ne’ebé halo ona projetu, tanba sá ema seluk mak bele hetan prioridade?” nia husu.
Mario afirma katak situasaun ne’e bele hamosu suspeita kona-ba diskriminasaun no uza familiarizmu ka partidarizasaun iha atribuisaun projetu.
Nia hateten mós katak nia sente triste tanba, tuir nia, kompania ne’ebé foin harii iha tinan 2024 no 2025 tenke hasoru kompetisaun iha prosesu ne’ebé nia konsidera presiza transparénsia no igualdade.
Munisípiu: Obra Nuno-Mogue no Hato-Builico to’o 68,75% Inklui Maubisse
Hatan ba alegasaun sira ne’e, Sekretáriu Assuntu Planeamentu, Albertino de Araujo, fó esplikasaun kona-ba progresu projetu infraestrutura iha área Nuno-Mogue Liga ba Postu Hato-Builico.
Albertino de Araujo nudar Sekretariu Assuntu Planeamentu hateten katak obra rehabilitasaun sira ne’e to’o ona progresu físiku 68,75%, enkuantu pagamentu atinji 64,35%.
Nia mós afirma katak autoridade munisípiu sei kontinua monitoriza implementasaun obra sira, ho objetivu atu projetu sira remata durante tinan 2026.
“Prezidente Autoridade fó ona orientasaun atu kompania bele halo servisu lalais, atu labele demora. Projetu sira ne’e, mais ou menus, tenke remata iha tinan 2026,” dehan Albertino.
Tuir informasaun ne’ebé jornlaista asesu husi pajina PAM Ainaro, Iha postu Administrativu Maubise projetu Konstruksaun sentru saude Mau-lau ne’ebé inplementa husi kompania lokal Maceu Unipesoal.Lda Ne’ebé hahu servisu iha loron 16 fulan julho tinan 2025, tuir kontratu remata iha fulan abril iha tinan 2026, maibe’e hafoin vijita PAM iha loron 7 julho, kompania deklara aumenta tan kontratu ba loron 17 fulan outubro 2026.
Empreza sira ne’ebé hetan projetu prense kritériu, dehan autoridade
Kona-ba prosesu tender, Albertino hateten katak empreza sira ne’ebé hetan projetu mak sira ne’ebé prense ona kritériu avaliasaun tuir prosesu tender.
Maibé, alegasaun hosi Mario kona-ba favoritizmu, partidarizasaun no konflitu interese presiza verifikasaun liután hosi autoridade kompetente ka fonte independente.
Husu transparénsia kona-ba PDIM
Kontestaun hosi Haburas Sarai, LDA, hamosu debate kona-ba nesesidade atu prosesu klasifikasaun, avaliasaun no atribuisaun projetu PDIM iha Ainaro bele asesível ba públiku.
Públiku presiza hetan informasaun klaru kona-ba kritériu klasifikasaun A no B, prosesu avaliasaun, rezultadu tender, baze legal no mekanizmu prevensaun konflitu interese.
Informasaun hirak ne’e importante atu garante katak osan públiku uza ho transparénsia, prosesu tender lao ho justisa, no projetu infraestrutura fó benefísiu ba komunidade.
Nota: Alegasaun kona-ba diskriminasaun, partidarizasaun, favoritizmu no konflitu interese iha matéria ida-ne’e seidauk hetan verifikasaun independente. Parte ka autoridade sira ne’ebé temi iha alegasaun sira hetan oportunidade atu fó resposta no klarifikasaun.
Jornalista: Carla/Elfiana
Editor :Clementina Fatima
