Lian Orluli, Ainaro, 19 Agostu 2026 — Komunidade Suku Mauchiga- Dare, realiza atividade diálogu no kalan reflesaun ho tema “Ita-Nia Memória, Ita-Nia Esperánsa”, nu’udar parte husi komemorasaun ba dala-44 Levantamentu Mauchiga–Dare no dala-51 Loron FALINTIL.
Atividade ne’e hala’o hodi fó espasu ba komunidade, veteranu, vítima no autoridade lokal sira atu fahe memória, istória no esperiénsia kona-ba luta no sakrifísiu iha períodu okupasaun.
Iha atividade ne’e, ekipa Centro Nacional Chega! I.P. (Centro Chega!), ne’ebé reprezenta husi Gaudencio Souza, Diretór Relasaun Esterna, Komunikasaun no Advokasia (DREKA), fahe informasaun kona-ba mandatu Centro Chega!, liuliu kona-ba prezervasaun memória no servisu sira ne’ebé hala’o ona.
Partisipante sira mos rona diretamente istória husi autór sira ne’ebé envolve iha Levantamentu Mauchiga–Dare, inklui testemuñu husi inan-feto vítima sira kona-ba sira-nia esperiénsia no impaktu husi eventu sira iha tempu ne’ebá.
Diálogu no reflesaun ne’e organiza konjuntamente husi veteranu no vítima Levantamentu Mauchiga–Dare, hamutuk ho autoridade lokal husi Suku Mauchiga no Mulo, Dare, Munisípiu Ainaro.
Antes hala’o atividade Diálogu Hahú uluk ho selebrasaun misa agradesementu iha kapela Mauchiga, hodi fó ondra no agradese ba martires sira, hanesan Komandante rejiaun haksolok, Vencio Feraz ho nia membru sira.
Atividade ne’e sai nu’udar momentu importante atu preserva memória istórika no hato’o ba jerasaun foun katak sakrifísiu no luta husi povu Timor-Leste tenke kontinua sai fonte aprendizajen ba harii dame, unidade no futuru ne’ebé di’ak liután.
Jornalista: Noy/ Deliya
Editor : Clementina Fatima
