Lian Orluli, 05 Juñu 2026 –Ainaro okupa segundu lugar iha Kompetisaun Karavana Oceano 2026, ne’ebé hala’o hodi komemora Loron Nasionál Oseanu Timor-Leste nian. Kompetisaun ne’ebé hala’o iha kapitál Dili, atrai partisipasaun hosi governante sira husi munisipiu 14 no grupu kriativu.
Ainaro nia partisipasaun iha eventu ne’e nu’udar rezultadu kolaborasaun entre Autoridade Munisipiu Ainaro liu husi nia Diresaun Servisu munisipal ba Jestaun Merkadu no Turizmu no grupu kreativu Fundasaun Nafofila. Sira nia prezensa fó apoiu ba programa governu, hodi komemora Loron Nasionál Oseanu nian no promove potensiál kulturál no kriativu rejiaun nian.
Jueder Asa Xavier husi Autoridade munisipiu Ainaro nia Diresaun Jestaun Merkadu no Turizmu haktuir katak nia ekipa hetan instrusaun direta husi Prezidente Autoridade munisipiu Ainaro hodi partisipa iha kompetisaun refere.
“Ami kolabora ho grupu kriativu Fundasaun Nafofila no simu instrusaun husi Prezidente Autoridade Munisipál Ainaro atu halo viajen ba Díli no partisipa iha Kompetisaun Karavana Oceano 2026, hamutuk ho partisipante sira hosi munisipiu 14 no grupu kriativu sira seluk, iha eventu ne’e munisipio Ainaro sai hanesan manan nain ba segundu lugar “ dehan Jueder Asa.
Komemorasaun Loron Nasionál Oseanu nian ba tinan ne’e hahú ho abertura ba espozisaun fotografia tasi nian iha loron 3 fulan Juñu iha Palásiu Governu, ne’ebé ofisialmente loke husi Primeiru-Ministru. Atividade sira seluk hala’o durante semana ida iha komemorasaun ne’e, inklui vizita marítima sira, parada tasi nian, espozisaun ekonomia azul nian, espozisaun turizmu nian, no atividade edukasionál no promosaun lubuk ida ba setór tasi nian.
Série atividade sira hala’o to’o loron 8 fulan-Juñu tinan 2026, ne’ebé deside ho Loron Mundiál Oseanu sira nian. Adisionalmente, Prezidente Repúblika Timor-Leste, José Ramos-Horta, hamutuk ho Primeiru-Ministru Kay Rala Xanana Gusmão no ofisiál governante sira partisipa iha limpeza tasi-ibun nian iha Dili, husi Tasi-ibun Cacéres to’o Largo Lecidere. Atividade sira ne’ebé hanesan hala’o mós iha munisipiu no rejiaun sira seluk iha Timor-Leste tomak.
Susesu Ainaro nian hodi hetan segundu lugar iha Kompetisaun Oceano Caravan 2026 hanesan testamentu ba komunidade lokál nia espíritu kriativu no kompromisu hodi apoia konservasaun tasi no dezenvolvimentu ekonomia azul iha Timor-Leste.
Ekipa Redasaun
