Lian Orluli 2 Setembru 2026 — Korpu Bombeiros Munisípiu Ainaro partisipa iha formasaun reciclagen tékniku-sientífiku durante loron rua, husi kuarta to’o kinta, hodi hametin sira-nia kbiit iha prevenesaun no kombate insendiu, buska no salvamentu, no primeiru sokorru ba vítima sira.
Formasaun ne’e hanesan programa rutina tinan-tinan nian husi Diresaun Nasionál Bombeiros hodi foti fali koñecimentu tékniku no fo kurafe ba pesoál sira iha territóriu tomak. Iha Munisípiu Ainaro, treinu ne’e abranje membru bombeiros hamutuk 24, ne’ebé kompostu husi feto ida no mane 23.
Representante Diretór Bombeiros, Sejario da Silva, esplika katak formasaun ne’e la’ós buat foun, maibé hanesan pasu ida atu atualiza téknika sira tuir evolusaun dezastre nian.
“Natureza dezastre nian sempre evolui. Formasaun reciclagenne’e fo biban ba bombeiros sira atu foti fali koñecimentu teoria no prátika, liliu oinsá kadi fali sira-nia matenek ba klasifikasaun hamate ahi no uzamentu meius teknolójiku sira,” klaresu Sejario.
Iha treinu ne’e, bombeiros sira mós aprofunda téknika rapel uzamentu korda individual, musketaun, no meius seguransa seluk hodi halo evakuasaun ba vítima sira ne’ebé monu iha rai naruk ho aas metru 60 to’o 80. Téknika ne’e presiza mentalidade ne’ebé fortu no treinu beibeik atu garante seguransa pesoál no vítima.
Iha sorin seluk, Komandante bombeiru Ainaro, Domingus da Silva, hato’o katak treinu ne’e ajuda tebes sira hodi reviu fali matéria sira ne’ebé sira aprende ho tempu naruk ona.
Iha parte hanesan, Jaimita De Araujo Missa, feto mesak ne’ebé servisu iha Korpu Bombeiros Ainaro, hateten katak feto mós iha kbiit no preparadu atu tuir operasaun emergénsia hamutuk ho bombeiros mane sira.
“Hau sente kontente tebes tuir reciclagem ne’e. Maske hau feto ida mesak, ne’e la’ós baiko ka impedimentu atu kombate ahi hamutuk ho mane sira. Hanesan feto, hau prontu atu servi komunidade iha situasaun emergénsia 24 oras,” dehan Jaimita.
Ho formasaun ne’e, Korpu Bombeiros Munisípiu Ainaro afirma sira-nia prontidão tomak atu responde no atuasaun ba kualker dezastre ka emergénsia iha área munisípiu nian.
Jornalista: Odelia de Araújo
Editor : Clementina Fatima
