Lian-Orluli 22/04/2026- komandante foun Munisípiu Ainaro, Superintendente xefe Emilio dos Santos kompromete, iha nia Manadatu sei orienta membru hotu iha Munisípiu Ainaro atu halao servisu tuir deit lei no orden hodi seguransa diak ba sidadaun sira.
Iha diskursu, komandante PNTL foun, Superintendente Chefe Emilio dos Santos garante, tomada posse ne’e aktu seremonial ida, maibé importánsia loloos mak PNTL tenke hala’o servisu ho profisional hodi hala’o kna’ar.
Tanba ne’e, nia fo hanoin ba membru PNTL tomak atu hala’o servisu atu servi publiku tuir de’it lei haruka no mantein ordem publiku.
Nia subliña, membru sira labele uza sala armas, atu armada sidadaun sira.
” Membru PNTL tomak atu serbí komunidade ho di’ak, tuir lei no regulamentu. Labele uza kilat hodi halo intimidasaun. Ita tenke respeita komunidade no harii komunikasaun liu husi koordenasaun no diálogu hodi prevene konflitu iha Ainaro,” Com PNTL Emilio fo atensaun.
Komandante Emilio mós hatutan tan katak estabilidade no seguransa nasionál depende maka’as ba papél ativu polísia nian hodi mantein relasaun armonia ho komunidade.
“Estabilidade nasaun nian iha ita hotu nia liman. Ita-boot sira maka halo papél ida hodi harii Repúblika Demokrátiku Timor-Leste nian”, nia haktuir
Komandante PNTL Municipiu Ainaro sesante, Superintendente Luis da Silva, hato’o mensajen despedida no diskursu benvindu iha eventu ofisiál ne’ebé hala’o ohin iha Kuartél Jerál Komandu PNTL Municipiu Ainaro. Iha ninia observasaun, komandante Luis da Silva afirma katak prezensa husi parte hotu-hotu iha eventu ne’e reflete kompromisu ne’ebé fahe hodi mantein seguransa no orden.
Luis subliña, eventu ida-ne’e mós sai hanesan oportunidade importante ida hodi simu komandante distritál foun, ne’ebé hahú nia knaar iha loron 20 fulan-abríl tinan 2026.
“Ohin, ita hotu halibur hodi simu ita-nia komandante distritál foun. Ida-ne’e mós hanesan loron serbisu importante ida ba Komandu PNTL Municipiu Ainaro. Prezensa Prezidente Autoridade Municipiu nian, hamutuk ho ofisiál no eskuadra sira, hatudu ita-nia responsabilidade kompartida hodi kontinua hamenus krime”, nia hatete.
Fatin hanesan Prezidente Autoridade Municipiu Ainaro, Manuela Georjina Carmo Bucar Corte-real, hato’o nia apresiasaun no agradesimentu ba Polisia Nasional Timor-Leste (PNTL) Municipiu Ainaro ba sira nia dedikasaun no kooperasaun hodi servi komunidade iha tinan rua nia laran. Iha ninia deklarasaun, nia rekoñese katak durante períodu ne’e, iha dezafiu oioin, inklui konflitu entre rezidente sira ne’ebé tenke rezolve. Maski nune’e, nia avalia katak PNTL nafatin iha komitmentu hodi mantein seguransa no orden iha area Ainaro.
” Hakarak agradese ba PNTL Municipiu Ainaro ba sira-nia kooperasaun hodi serbí komunidade durante tinan rua liubá, maski iha problema no konflitu barak ne’ebé ami tenke hasoru,” nia hatete.
Manuela mós hato’o nia apresiasaun ba kompañia Fortuna, ne’ebé nia fiar kontribui ona ba dezenvolvimentu, partikularmente iha loke asesu estrada ba komunidade. Nia hatete katak prezensa empreza nian iha impaktu pozitivu no la rezulta iha keixa ruma husi rezidente sira.
Nune’e mós Prezidente CMCLN, Agusto Tara Araujo, iha biban hanesan subliña importánsia unidade no kooperasaun entre elementu hotu-hotu sosiedade nian hodi avansa Ainaro.
“Ainaro tenki harii amizade, unidade, no aprezenta ideia foun. Polísia, komunidade, Autoridade lokál, no veteranu sira tenki hamutuk no labele fahe malu,” nia subliña.
Agusto subliña importánsia husi papél feto nian iha lideransa iha Ainaro. Nia nota katak, dezde pasadu, laiha feto ida maka lidera iha Municipiu. Ita hein katak loron ida sei iha feto ida lidera, mezmu sai komandante polísia, iha Ainaro,” nia akresenta.
Iha ninia deklarasaun nia rohan, nia mós hato’o ninia agradesimentu ba PAM no komandante polísia ba sira-nia esforsu estra ordináriu hodi rezolve kestaun kompleksu oioin durante sira-nia mandatu.
Deklarasaun ida ne’e hein atu enkoraja parte hotu-hotu atu kontinua hametin kolaborasaun hodi kria Ainaro ida ne’ebé seguru, pasífiku, no progresivu.
Jornalista:Carla/Elfiana/Noy
Editor : Clementina Fatima
