Lian Orluli—Prezidenti Interinu Autoridade Municipal Ainaro Ruivo Magno, husu komunidade Maubisse atu apoiu masimu atividade festival kultural iha Rabilau Maubisse.
Prezidenti Interino Autoridade Municipal de Ainaro Ruivo Magno hateten katak;
“Parte Munisipiu Ainaro sei apoiu masimu ba atividade husi Gabineti Prezidente Repúblika, nuné bele realiza Festival Kultural Rabilau lao ho diak, tan ne’e, ha’u nafatin husu ba komunidade liu-liu parte Maubisse atu apoiu masimu ba atividade Festival Rabilau ne’e, ha’u apoiu masimu atividade ne’ebe maka husi gabineti prezidente Republika, iha momentu ida ne’e mos hanesan Sekretariu Estadu Arte no Kultura fo ona mensajen katak, husu nafatin ba komunidade Maubisse atu apoiu masimu ba atividade Festival Rabilau”. Hateten Prezidenti Autoridade Munisipiu Ainaro Ruivo Magno
Jestora ba RIVAM BEKRI Ainaro Sandra Maria do Seu Costa Bosa ne’ebe mos partisipa iha sorumutuk dala ikus nian ba Festival Rabilau Maubisse nia parte kontenti tebes tanba liu husi festival ne’ebe sei reliza iha semana oin ne’e bele promove mos produtu balu husi Ainaro ne’ebe nia parte prepara ona.
“Ha’u senti kontenti tanba bele mai partisipa Festival Kultural Rabilau ne’ebe mak sei hala’o iha semana oin, ha’u mai ho ha’u nia produtu lokal atu promove ai-han lokal sira ne’ebe sei nakfilak ba dose, liu liu husi fehuk, ai-farina, talas no produtu lokal sira seluk, ne’ebe bele halo Inovasaun fali ba dose”. Dehan Sandra Maria do Seu Costa Bosa
Antes hakotu Sandra husu ba nia feto Maluk sira atu la bele senti moe no tauk ka la vale iha komunidade seluk nia leet no tenki partisipa iha eventu sira nune’e hodi bele promove produtu lokal ne’ebe ita iha, tamba ne’e husu ba feto maluk sira katak;
“ Labele lakon oportunidade sira hanesan ne’e, Ita hanesan futuru nasaun nian, ita mak tenki promove ita nia riku son sira ne’ebe mak iha Ita nia rai, tamba ne’e husu ba feto maluk sira labele moe no senti tauk ka la vale iha komunidade seluk nia leet no eventu sira hanesan ne’e ita boot sira tenki partisipa”. Rekomenda Sandra Maria do Seu Costa Bosa
Enkontru ne’ebe realiza iha Rabilau Maubisse Organiza husi Gabinete prezidenti da Republika lidera direta husi Secretariu Estadu Arte no Kultura, akompanha husi Prezidenti Interino Autoridade Munisipal de Ainaro Ruivo Magno, Komandante PNTL Municipio Ainaro, nomos grupo negosiante sira ho Komunidade no lia nain balu iha Rabilau Maubisse.
Enkuantu, festival kultura Rabilau ne’ebe sei festeza iha semana oin, sei partisipa mos husi Prezidente Republika, Primeiru Ministru’ membru Governo balu, membru Parlamentu, Korpu diplomatiku, grupu kultural husi 13 Munisipiu, inklui munisipiu Ainaro, nomos vizitantes sira husi rai liur no rai laran.
Jornalista Estajiadu: Luciana Reis da Cruz/ Carme de Jesus Flora
Editor: Lian Orluli.
