Lian Orluli, Ainaro,26 Agosto — TIC Timor I.P hala’o programa formasaun teknolojia dijitál ho objetivu atu hasa’e koñesimentu no abilidade funsionáriu sira iha uza ferramenta no aplikasaun dijitál atu apoia sira-nia servisu loroloron.
Koordenadór Formasaun iha TIC Timor I.P, Tiago do Santos Fernandes, hateten katak formasaun ne’e fó oportunidade ba partisipante sira atu aprende no pratika diretamente kona-ba uza ferramenta teknolojia ne’ebé importante ba servisu.
Tuir Tiago, partisipante sira simu instrusaun no formasaun prátika kona-ba utilizasaun aplikasaun software eskritóriu, hanesan Microsoft Word, Excel no PowerPoint. Formasaun ne’e mós kobre utilizasaun email ofisiál ba komunikasaun no haruka no simu mensajen iha fatin servisu.
“Treinamentu ne’e ho objetivu atu hasa’e koñesimentu no abilidade funsionáriu sira nian kona-ba utilizasaun teknolojia, atu nune’e sira bele hala’o tarefa sira ho fasilidade no efisiénsia liután,” Tiago hateten.
Aleinde abilidade bázika iha teknolojia eskritóriu, programa ne’e mós introdús partisipante sira ba dezenvolvimentu teknolojia foun, inklui intelijénsia artifisiál (AI).
Tuir Tiago, AI iha poténsia atu ajuda funsionáriu sira kompleta tarefa oioin ho lalais, efetivu no efisiente liután, liuliu iha prosesu servisu ne’ebé bele benefisia husi utilizasaun teknolojia dijitál.
Tiago hatutan katak formasaun ne’e mós aliña ho programa Governu nian ne’ebé promove implementasaun governu eletróniku no aselera prosesu transformasaun dijitál iha setór públiku.
Hodi hasa’e kapasidade rekursu umanu iha área teknolojia, espera katak funsionáriu sira sei preparadu di’ak liután atu adapta ba mudansa dijitál no utiliza teknolojia ho efetivu. Ho nune’e, sira bele presta servisu públiku no hala’o tarefa governu nian ho efisiénsia no kualidade di’ak liután.
Jornalista : Carla/Elfiana
Editor : Clementina Fatima
